ក្រុមមន្ត្រីប៉ាឡេស្ទីនបាននិយាយថា កងកម្លាំងអ៊ីស្រាអែលបានបំផ្លាញអគារលំនៅឋានយ៉ាងហោចណាស់ចំនួន ៣០កន្លែង នៅទីក្រុងហ្កាហ្សា ហើយបានបង្ខំឲ្យមនុស្សរាប់ពាន់នាក់រត់ចោលផ្ទះសម្បែងរបស់ពួកគេ ខណៈរដ្ឋមន្ត្រីការបរទេសអាមេរិកលោក Marco Rubio បានមកដល់អ៊ីស្រាអែលកាលពីថ្ងៃអាទិត្យ ១៤ កញ្ញា ដើម្បីពិភាក្សាអំពីអនាគតនៃជម្លោះ។

លោកនាយករដ្ឋមន្ត្រី Benjamin Netanyahu បានថ្លែងអំណរគុណដល់ប្រមុខការទូតអាមេរិក អំឡុងទស្សនកិច្ចទៅកាន់ Western Wall ដែលជាទីសក្ការបូជាដ៏ពិសិដ្ឋក្នុងសាសនារបស់ប្រជាជនជ្វីហ្វ ជាទីដែលលោកទាំងពីរពិភាក្សាអំពីសង្គ្រាមជាមួយក្រុមហាម៉ាស និងប្រតិបត្តិការសឹកហ្កាហ្សា។

អ៊ីស្រាអែលបាននិយាយថា ខ្លួនគ្រោងនឹងដណ្តើមយកទីក្រុងនេះ ជាទីដែលប្រជាជនប៉ាឡេស្ទីនប្រហែលមួយលាននាក់បានជ្រកកោន ជាផ្នែកនៃគោលបំណងដែលបានប្រកាសរបស់ខ្លួនក្នុងការលុបបំបាត់ក្រុមសកម្មប្រយុទ្ធ ហាម៉ាស និងបានបង្កើនការវាយប្រហារកាន់តែសន្ធាប់ទៅលើអ្វីដែលខ្លួនហៅថាជាបន្ទាយចុងក្រោយរបស់ក្រុមសកម្មប្រយុទ្ធប៉ាឡេស្ទីន។ 

មេដឹកនាំនយោបាយរបស់ក្រុមហាម៉ាស ដែលបានចូលរួមក្នុងការចរចាដោយប្រយោលស្តីពីបទឈប់បាញ់ និងកិច្ចព្រមព្រៀងដោះលែងចំណាប់ខ្មាំង ត្រូវបានកំណត់គោលដៅដោយអ៊ីស្រាអែលក្នុងការវាយប្រហារតាមអាកាសនៅទីក្រុងដូហា ប្រទេសកាតា កាលពីថ្ងៃអង្គារសប្ដាហ៍មុន ដែលទាក់ទាញការថ្កោលទោសជាសកល។     

ប្រទេសកាតា នឹងធ្វើជាម្ចាស់ផ្ទះនៃកិច្ចប្រជុំកំពូលអារ៉ាប់-អ៊ីស្លាមនៅថ្ងៃចន្ទនេះ ដើម្បីពិភាក្សាអំពីវិធានការបន្ទាប់។ លោក Rubio បាននិយាយថា ទីក្រុងវ៉ាស៊ីនតោនចង់និយាយអំពីរបៀបដោះលែងចំណាប់ខ្មាំងទាំង ៤៨ នាក់ដែលនៅតែឃុំខ្លួនដោយក្រុមហាម៉ាសនៅតំបន់ហ្កាហ្សាស្ទ្រីប និងការកសាងឡើងវិញ។ មានតែចំណាប់ខ្មាំង២០នាក់ប៉ុណ្ណោះដែលត្រូវបានគេជឿថានៅមានជីវិត៕