ប្រភពមួយដែលដឹងពីបញ្ហានេះបានប្រាប់សារព័ត៌មានរ៉យទ័រថា រដ្ឋបាលរបស់លោកប្រធានាធិបតីអាមេរិក Donald Trump ត្រូវបានគេរំពឹងថា នឹងបន្ថែមពេលវេលាជាថ្មីម្តងទៀត ពីលើកាលបរិច្ឆេទកំណត់មានស្រាប់នៅថ្ងៃទី១៧ ខែកញ្ញា ខាងមុខ សម្រាប់ឱ្យក្រុមហ៊ុនមេ ByteDance របស់ចិន ក្នុងការលក់ទ្រព្យសម្បត្តិនៅសហរដ្ឋអាមេរិក នៃកម្មវិធីវីដេអូខ្លី TikTok របស់ខ្លួន បើពុំនោះសោតនឹងត្រូវប្រឈមការហាមឃាត់។ យ៉ាងណាមិញ កាលកំណត់ថ្មីមិនទាន់ត្រូវបានគេដឹងភ្លាមៗនោះទេ។

វិធានការនេះនឹងក្លាយជាការបន្ធូរបន្ថយលើកទី៤ហើយ ដែលលោក Trump បានផ្ដល់ឱ្យ TikTok ដោយបញ្ចៀសអេបនេះពីការអនុវត្តច្បាប់សហព័ន្ធ ដែលពីដំបូងឡើយបានផ្តល់ឱ្យ ByteDance ត្រឹមខែមករា ឆ្នាំ២០២៥ ប៉ុណ្ណោះ ដើម្បីលក់អេប ឬប្រឈមការបិទប្រព័ន្ធផ្សព្វផ្សាយសង្គមដ៏ពេញនិយមមួយនេះ។

កាលពីខែមុន លោក Trump បាននិយាយថា លោកមានអ្នកទិញជនជាតិអាមេរិក តម្រង់ជួរចាំទិញកម្មវិធីនេះហើយ ហើយអាចពន្យាពេលកំណត់បន្ថែមទៀតដើម្បីដំណើរការរឿងនេះ ប៉ុន្តែលោកបែរជាបង្ហាញពីភាពមិនច្បាស់លាស់កាលពីថ្ងៃអាទិត្យ (១៤ កញ្ញា) នៅពេលត្រូវសាកសួរពីអនាគតរបស់កម្មវិធីនេះ។ លោក Trump បានប្រាប់អ្នកយកព័ត៌មានថា៖ "អាចមានអ្នកទិញ ហើយក៏អាចគ្មានអ្នកទិញដែរ.... អាមេរិកកំពុងតែចរចារឿង TikTok ហើយអាស្រ័យលើចិន"។

សេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយលើការពន្យារពេលដែលរំពឹងទុកនេះទេ ប៉ុន្តែប្រសិនបើជំហាននេះទទួលបានការអនុញ្ញាតពិតមែន នោះអាចនឹងបង្ហាញពីការស្ទាក់ស្ទើរយ៉ាងច្បាស់ក្នុងការបិទកម្មវិធី TikTok ដែលប្រើដោយជនជាតិអាមេរិកដល់ទៅ ១៧០លាននាក់៕