រុស្ស៊ី បាននិយាយកាលពីថ្ងៃអាទិត្យថា ខ្លួនបានបាញ់មីស៊ីលកំណត់គោលដៅល្បឿនលឿនជាងសំឡេង Zircon (Tsirkon) នៅគោលដៅមួយក្នុងសមុទ្រ Barents ហើយថាយន្តហោះទម្លាក់គ្រាប់បែកបំបាំងកាយ Sukoi Su-34 បានអនុវត្តការវាយប្រហារជាផ្នែកនៃសមយុទ្ធយោធារួមគ្នាជាមួយបេឡារុស។

ក្រសួងការពារជាតិរុស្ស៊ីបាននិយាយថា សមយុទ្ធយោធា "Zapad" ឬ West របស់រុស្ស៊ី ជាមួយបេឡារុស បានចាប់ផ្តើមកាលពីថ្ងៃទី ១២ កញ្ញា ក្នុងគោលបំណងធ្វើឱ្យប្រសើរឡើងនូវបញ្ជាការ និងការសម្របសម្រួលក្នុងករណីមានការវាយប្រហារលើប្រទេសរុស្ស៊ី ឬបេឡារុស។  

ទីក្រុងមូស្គូ និងទីក្រុងមីនស៍(Minsk) បាននិយាយថា សមយុទ្ធនេះគឺជាការការពារទាំងស្រុង ហើយថាពួកគេពុំមានបំណងវាយប្រហារសមាជិកណាតូណាមួយឡើយ ទោះបីជាសម្ព័ន្ធយោធាដឹកនាំដោយសហរដ្ឋអាមេរិកបានប្រកាសប្រតិបត្តិការ "ឆ្មាំបូព៌ា" បន្ទាប់ពីការលុកលុយរបស់យានដ្រូនរុស្ស៊ី ចូលប្រទេសប៉ូឡូញកាលពីថ្ងៃទី ៩ដល់ថ្ងៃ១០ កញ្ញាក៏ដោយ។

ក្រសួងការពារជាតិរុស្ស៊ីបានបញ្ចេញវីដេអូ នាវាចម្បាំង Admiral Golovko នៃកងនាវាចរភាគខាងជើង ដែលបានបាញ់មីស៊ីលល្បឿនលឿនជាងសំឡេងZircon នៅគោលដៅមួយនៅសមុទ្រ Barents ។វីដេអូបង្ហាញថា មីស៊ីលមួយត្រូវបានបាញ់ចេញពីនាវា ហើយបន្ទាប់មកបានធ្លាក់នៅចំណុចមួយ។

លោកប្រធានាធិបតីរុស្ស៊ី Vladimir Putin បាននិយាយកាលពីឆ្នាំ២០១៩ ថា មីស៊ីល Zircon អាចហោះក្នុងល្បឿនលឿនជាងសំឡេង ដល់ទៅ ៩ដងនិងវាយប្រហារគោលដៅនានានៅសមុទ្រ និងលើដីក្នុងរយៈចម្ងាយជាង ១.០០០គីឡូម៉ែត្រ៕