យោងតាមសេចក្តីព្រាងនៃសេចក្ដីសម្រេចដែលនឹងដាក់ក្នុងកិច្ចប្រជុំកំពូលអារ៉ាប់-អ៊ិស្លាម នៅថ្ងៃចន្ទ (១៥ កញ្ញា) នេះ បានបង្ហាញថា បណ្ដាមេដឹកនាំនៃរដ្ឋអារ៉ាប់ និងរដ្ឋអ៊ិស្លាម មានគម្រោងព្រមានខ្លាំងៗថា ការវាយប្រហាររបស់អ៊ីស្រាអែល លើកាតា និង "អំពើអរិភាព" ផ្សេងទៀត ជាការគំរាមកំហែងដល់សន្តិសហវិជ្ជមាន និងកិច្ចប្រឹងប្រែងធ្វើប្រក្រតីភាពទំនាក់ទំនងរបស់អ៊ីស្រាអែល នៅក្នុងតំបន់។

កិច្ចប្រជុំកំពូលនេះកំពុងត្រូវបានកោះប្រជុំនៅទីក្រុងដូហា ដើម្បីបង្ហាញការគាំទ្រសម្រាប់កាតា បន្ទាប់ពីការវាយប្រហាររបស់អ៊ីស្រាអែល សំដៅទៅលើមេដឹកនាំក្រុមសកម្មប្រយុទ្ធប៉ាឡេស្ទីនហាម៉ាស ដែលស្នាក់នៅក្នុងរដ្ឋឈូងសមុទ្រមួយនេះ។

ការវាយប្រហារកាលពីថ្ងៃទី៩ ខែកញ្ញា ដែលក្រុមហាម៉ាស និយាយថាបានសម្លាប់សមាជិក ៥នាក់ ប៉ុន្តែមិនមែនជាថ្នាក់ដឹកនាំរបស់ខ្លួនទេនោះ បានជំរុញឱ្យបណ្ដារដ្ឋឈូងសមុទ្រអារ៉ាប់ ដែលជាសម្ព័ន្ធមិត្តរបស់សហរដ្ឋអាមេរិក ខឹងសម្បារយ៉ាងខ្លាំង ដោយបន្ថែមភាពតានតឹងកាន់តែអាក្រក់ក្នុងទំនាក់ទំនងរវាងអារ៉ាប់រួម និងអ៊ីស្រាអែល ដែលបានធ្វើប្រក្រតីភាពទំនាក់ទំនងនៅឆ្នាំ២០២០។

សម្រង់សេចក្តីព្រាងនៃសេចក្តីសម្រេចក្នុងជំនួបនេះ ដែលមើលឃើញដោយសារព័ត៌មានរ៉យទ័រ បាននិយាយថា "ការវាយប្រហារដ៏ឃោរឃៅរបស់អ៊ីស្រាអែលលើកាតា និងការបន្តនៃអំពើអរិភាពរបស់អ៊ីស្រាអែល រួមទាំងការប្រល័យពូជសាសន៍ ការបោសសម្អាតជនជាតិភាគតិច ភាពអត់ឃ្លាន ការឡោមព័ទ្ធ និងសកម្មភាពដាក់អាណានិគម និងគោលនយោបាយពង្រីកទឹកដី គឺជាការគំរាមកំហែងដល់អនាគតនៃសន្តិភាព និងសន្តិសហវិជ្ជមានក្នុងតំបន់"។ សេចក្តីព្រាងដែលត្រូវរៀបរៀងឡើងនៅមុនកិច្ចប្រជុំកំពូល បានសង្កត់ធ្ងន់ថា សកម្មភាពទាំងនេះគំរាមកំហែង "គ្រប់យ៉ាងដែលសម្រេចបាន លើមាគ៌ានៃការធ្វើប្រក្រតីភាពទំនាក់ទំនងជាមួយអ៊ីស្រាអែល រួមទាំងកិច្ចព្រមព្រៀងបច្ចុប្បន្ន និងអនាគត"៕