ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យ (១៤ កញ្ញា) ថា កងកម្លាំងអ៊ុយក្រែន បានវាយរុលទៅមុខក្នុងផ្នែកព្រំដែននៃតំបន់ Sumy ភាគខាងជើងប្រទេស ជាតំបន់មួយដែលកងទ័ពរុស្ស៊ី ព្យាយាមវាយដណ្ដើមអស់ពេលជាច្រើនខែមកហើយដើម្បីបង្កើតមូលដ្ឋានទ័ព។

ក្នុងសុន្ទរកថាវីដេអូពេលយប់របស់ខ្លួន លោក Zelenskyy ក៏បានដកស្រង់សម្តីមេបញ្ជាការជាន់ខ្ពស់របស់អ៊ុយក្រែនផងដែរ ដោយនិយាយថា កងកម្លាំងទីក្រុងមូស្គូ រងការខាតបង់យ៉ាងសំខាន់ក្នុងតំបន់ Donetsk និង Kharkiv តាមបណ្តោយជួរមុខ ១.០០០គីឡូម៉ែត្រ។ ការមានប្រៀបឡើងវិញរបស់អ៊ុយក្រែននេះ កើតឡើងបន្ទាប់ពីរយៈពេល ១សប្តាហ៍នៃសេចក្តីថ្លែងការណ៍របស់រុស្ស៊ី ដែលគូសបញ្ជាក់ពីអ្វីដែលទីក្រុងមូស្គូពិពណ៌នាថា ជាការមានប្រៀបខ្លាំងនៅក្នុងតំបន់ Dnipropetrovsk ប៉ែកកណ្តាល។

កងទ័ពរុស្ស៊ី កំពុងចូលរួមក្នុងប្រតិបត្តិការវាយរុញយឺតៗទូទាំងភាគខាងកើតអ៊ុយក្រែន ជាមួយនឹងការអះអាងស្ទើរតែរាល់ថ្ងៃពីការវាយដណ្ដើមបានភូមិនានារបស់អ៊ុយក្រែន។ ក្រោយសង្រ្គាមជាង ៣ឆ្នាំ ទីក្រុងមូស្គូបានដាក់បញ្ចូលតំបន់ចំនួន៤ ដែលខ្លួនកាន់កាប់ដោយផ្នែក ពោលគឺតំបន់ Donetsk, Luhansk, Zaporizhzhia និង Kherson ប៉ុន្តែមិនមែនតំបន់ Dnipropetrovsk នោះទេ ដែលរហូតមកដល់ពេលនេះ រុស្ស៊ីអះអាងថា ខ្លួនកំពុងដណ្តើមយកភូមិជាច្រើននៅជាយព្រំដែនរដ្ឋបាលរបស់ Dnipropetrovsk។

ចាប់តាំងពីការបណ្តេញកងកម្លាំងអ៊ុយក្រែន ចេញពីតំបន់ Kursk របស់រុស្ស៊ី កាលពីដើមឆ្នាំនេះមក ទាហានរុស្ស៊ី បានព្យាយាមបង្កើតនូវអ្វីដែលវិមានក្រឹមឡាំងហៅថាតំបន់ទ្រនាប់នៅក្នុងតំបន់ Sumy ហើយរុស្ស៊ីតែងតែវាយលុកទីក្រុងធំៗ រួមទាំងទីក្រុង Sumy របស់តំបន់នេះផងដែរ៕