ក្រសួងពាណិជ្ជកម្មទីក្រុងសេអ៊ូល បាននិយាយថា ប្រេសិតជាន់ខ្ពស់ផ្នែកពាណិជ្ជកម្មរបស់កូរ៉េខាងត្បូង លោក Yeo Han-koo កំពុងធ្វើដំណើរទៅកាន់សហរដ្ឋអាមេរិក នៅថ្ងៃចន្ទ (១៥ កញ្ញា) នេះ ដើម្បីតាមដានកិច្ចចរចារពន្ធគយ ខណៈប្រទេសទាំងពីរកំពុងប្រឹងប្រែងជម្នះឧបសគ្គដើម្បីសម្រេចចុងក្រោយនូវកិច្ចព្រមព្រៀងពាណិជ្ជកម្ម ដែលព្រមព្រៀងគ្នារួចមកហើយកាលពីខែកក្កដា ដោយមើលឃើញអាមេរិកបន្ទាបពន្ធមកត្រឹម ១៥% លើកូរ៉េខាងត្បូង។

សេចក្ដីលម្អិតនៃកិច្ចព្រមព្រៀងពាណិជ្ជកម្មដ៏ទូលំទូលាយមួយ នៅតែមិនទាន់រួចរាល់ ជាពិសេសជុំវិញមូលនិធិវិនិយោគ ៣៥០ពាន់លានដុល្លារ។ ក្រុមមន្ត្រីក្នុងទីក្រុងសេអ៊ូល ធ្លាប់និយាយថា កិច្ចពិភាក្សាកំពុងត្រូវពន្យារពេលដោយសារតែលក្ខខណ្ឌមានចែងក្នុងកិច្ចព្រមព្រៀងពាណិជ្ជកម្មស្រដៀងគ្នា ដែលជប៉ុនបានធ្វើជាមួយអាមេរិក គឺមិនអាចទទួលយកបានឡើយសម្រាប់កូរ៉េខាងត្បូង ព្រោះប៉ះពាល់ដល់ទីផ្សាររូបិយបណ្ណបរទេស។

លោក Kim Yong-beom ទីប្រឹក្សាជាន់ខ្ពស់នៃគោលនយោបាយប្រធានាធិបតីកូរ៉េខាងត្បូង បាននិយាយថា កិច្ចពិភាក្សាកាលពីសប្តាហ៍មុន "ជាប់គាំង" ជុំវិញបញ្ហាប្តូរប្រាក់បរទេស ដោយបង្ហាញក្ដីបារម្ភពីផលវិបាកចំពោះទុនបម្រុងរូបិយបណ្ណបរទេស ក្នុងការអនុវត្តកញ្ចប់វិនិយោគ ៣៥០ពាន់លានដុល្លារ។

នៅពេលត្រូវសាកសួរថាតើការចរចាកំពុងអូសបន្លាយឬក៏អត់នោះ អ្នកនាំពាក្យប្រធានាធិបតីកូរ៉េខាងត្បូង លោកស្រី Kang Yu-jung បាននិយាយនៅថ្ងៃចន្ទដដែលនេះថា រដ្ឋាភិបាលនឹងចរចាជាមួយទីក្រុងវ៉ាស៊ីនតោន រហូតទទួលបានលទ្ធផលដែលបង្កើនប្រយោជន៍ជាតិរបស់កូរ៉េខាងត្បូង រួមទាំងទុនបម្រុងរូបិយបណ្ណបរទេស និងការការពារដល់ក្រុមហ៊ុននានាក្នុងប្រទេស៕