កងកម្លាំងអ៊ីស្រាអែលបានសម្លាប់ពលរដ្ឋប៉ាឡេស្ទីនជិត៧០នាក់ និងជាង៣០០នាក់រងរបួស នៅទូទាំងតំបន់ហ្កាហ្សាស្ទ្រីប និងបានបំផ្លាញអគារចំនួន១៦កន្លែងនៅទីក្រុងហ្កាហ្សា រួមទាំងអគារលំនៅឋានខ្ពស់ចំនួន៣កន្លែងខណៈកងកម្លាំងបង្កើនការវាយលុកដើម្បីដណ្តើមយកទីក្រុងភាគខាងជើង និងជម្លៀសប្រជាជននៅទីក្រុងនោះ។

យោងតាមក្រុមគ្រូពេទ្យបានឱ្យដឹងថា ជនរងគ្រោះរាប់សិបនាក់កាលពីថ្ងៃអាទិត្យត្រូវបានសម្លាប់នៅក្នុងទីក្រុងហ្កាហ្សា។ យោងតាមអាជ្ញាធរសុខាភិបាលរបស់ទីក្រុងបានឲ្យដឹងថា ពលរដ្ឋប៉ាឡេស្ទីនពីរនាក់បន្ថែមទៀតបានស្លាប់ដោយសារកង្វះអាហារូបត្ថម្ភ ដោយបានធ្វើឱ្យចំនួនអ្នកស្លាប់ដោយសារភាពអត់ឃ្លានកើនឡើងដល់៤២២នាក់ ចាប់តាំងពីការចាប់ផ្តើមសង្រ្គាមរបស់អ៊ីស្រាអែល។

នៅទីក្រុងហ្កាហ្សា យោធាអ៊ីស្រាអែលបានកំណត់ប៉ម al-Kawthar ក្នុងសង្កាត់ Remal ភាគខាងត្បូងជាគោលដៅ មុនពេលចាប់ផ្តើមការវាយលុកដោយមីស៊ីល ដែលបានបំផ្លាញអគារនោះរយៈពេលពីរម៉ោងក្រោយមក។ ការទម្លាក់គ្រាប់បែកឥតឈប់ឈរបានបង្ខំមនុស្សរាប់ម៉ឺននាក់ភៀសខ្លួន។ ការិយាល័យប្រព័ន្ធផ្សព្វផ្សាយរដ្ឋាភិបាលនៅតំបន់ហ្កាហ្សាបានថ្កោលទោស «ការទម្លាក់គ្រាប់បែកជាប្រព័ន្ធ» របស់អ៊ីស្រាអែលទៅលើអគារស៊ីវិល ដោយនិយាយថា គោលបំណងនៃការវាយលុកគឺ «ការធ្វើឲ្យវិនាស និងជម្លៀសប្រជាជនដោយបង្ខំ»។ ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន(UNRWA) លោក Philippe Lazzarini បាននិយាយនៅក្នុងការបង្ហោះនៅលើបណ្តាញ X ថាអគារចំនួន១០កន្លែងរបស់ទីភ្នាក់ងារនេះត្រូវបានវាយប្រហារនៅទីក្រុងហា្កហ្សា ក្នុងរយៈពេល៤ថ្ងៃកន្លងទៅនេះ ក្នុងនោះរួមមានសាលារៀនចំនួន៧កន្លែង និងគ្លីនិកចំនួន២កន្លែងដែលកំពុងផ្តល់ទីជម្រកដល់ជនភៀសខ្លួនរាប់ពាន់នាក់។ លោកបាននិយាយថា គ្មានកន្លែងណាសុវត្ថិភាពទេហើយក៏គ្មាននណាម្នាក់សុវត្ថិភាពដែរ។