សហរដ្ឋអាមេរិក កូរ៉េខាងត្បូង និងជប៉ុន បានបើកសមយុទ្ធប្រចាំឆ្នាំរួមគ្នារយៈពេល ៥ថ្ងៃ នៃដែនអាកាស និងកងទ័ពជើងទឹក លើកោះ Jeju របស់កូរ៉េខាងត្បូង នៅថ្ងៃចន្ទ (១៥ កញ្ញា) នេះ នៅក្នុងការហ្វឹកហ្វឺនរួមចុងក្រោយបំផុតរបស់សម្ព័ន្ធមិត្តទាំងបី ដែលត្រូវរិះគន់ខ្លាំងៗដោយកូរ៉េខាងជើង ថាជា "ការបង្អួតកម្លាំងដោយមិនមានភាពប្រុងប្រយ័ត្ន"។

ក្រសួងការពារជាតិកូរ៉េខាងត្បូងនិយាយថា សមយុទ្ធរួមនេះឈ្មោះថា សមយុទ្ធសេរីភាព Freedom Edge ដែលកំពុងដំណើរការនៅកោះ Jeju ភាគខាងត្បូងរបស់កូរ៉េខាងត្បូង រហូតដល់ថ្ងៃសុក្រសប្ដាហ៍នេះ ហើយមានគោលបំណងពង្រឹងសមត្ថភាពប្រតិបត្តិការរួមគ្នារបស់ប្រទេសទាំងបី ទាំងក្នុងសមុទ្រ អាកាស និងផ្នែកអ៊ីនធឺណិត និងជាភាពចាំបាច់ដើម្បីទប់ទល់នឹងការគំរាមកំហែងនុយក្លេអ៊ែរ និងមីស៊ីលដែលកំពុងកើនឡើងរបស់កូរ៉េខាងជើង។

នាយសេនាធិការចម្រុះរបស់កូរ៉េខាងត្បូង បាននិយាយនៅដើមខែកញ្ញាថា សមយុទ្ធ Freedom Edge នេះគឺជាការហាត់សមប្រចាំឆ្នាំដែលរៀបចំឡើងដើម្បីអនុវត្តសន្តិភាព និងស្ថិរភាពក្នុងតំបន់ ដោយបន្ថែមថា សមយុទ្ធនេះនឹងធ្វើឡើងស្របតាមច្បាប់អន្តរជាតិ។

ទីបញ្ជាការឥណ្ឌូ-ប៉ាស៊ីហ្វិក របស់អាមេរិក និយាយថា សមយុទ្ធនឹងរួមបញ្ចូលនូវទ្រព្យសម្បត្តិរបស់កងម៉ារីន និងទ័ពអាកាសរបស់ទីក្រុងវ៉ាស៊ីនតោន និងបង្ហាញពី សមយុទ្ធមីស៊ីលបាលីស្ទិក និងការពារដែនអាកាស ដែលកាន់តែប្រសើរជាងមុន ការជម្លៀសផ្នែកវេជ្ជសាស្រ្ត និងការហ្វឹកហ្វឺនប្រតិបត្តិការដែនសមុទ្រ ដែលធ្វើឱ្យសមយុទ្ធនេះក្លាយជា "ការបង្ហាញក្នុងកម្រិតខ្ពស់បំផុតនៃកិច្ចសហប្រតិបត្តិការការពារជាតិត្រីភាគីរហូតមកដល់បច្ចុប្បន្ន"៕