រុស្ស៊ី៖ ក្រសួងការពារជាតិរុស្ស៊ីកាលពីថ្ងៃពុធបានចេញផ្សាយវីដេអូ ដែលបង្ហាញពីរថយន្តយោធារុស្ស៊ីធ្វើដំណើរឆ្ពោះទៅរកទីតាំងបាញ់ សម្រាប់ការធ្វើសមយុទ្ធនៅក្នុងតំបន់ Rostov ភាគនិរតីរបស់ប្រទេសដែលមានព្រំប្រទល់ជាប់តំបន់ Donetsk និង Luhansk របស់ប្រទេសអ៊ុយក្រែន។
សេចក្តីថ្លែងការណ៍របស់ក្រសួងបាននិយាយថា កងកាំភ្លើងវែងត្រូវបានដាក់ពង្រាយក្នុងការប្រកាសអំពីការអនុវត្ត ហើយនឹងចាប់ផ្តើមឆ្ពោះទៅរកជួរបាញ់សម្រាប់សមយុទ្ធ។ អង្គភាពនឹងធ្វើការលើការងារសមយុទ្ធរួមទាំងការគាំទ្រគ្រប់ជ្រុងជ្រោយ និងការបណ្តុះបណ្តាលការបាញ់ប្រហារ។ រុស្ស៊ីបានដាក់ពង្រាយកងទ័ពប្រមាណ ១០ម៉ឺននាក់នៅជិតប្រទេសអ៊ុយក្រែនក្នុងប៉ុន្មានសប្តាហ៍ថ្មីៗនេះ បណ្តាលឱ្យមានការព្រួយបារម្ភថា ប្រទេសនេះមានផែនការឈ្លានពានប្រទេសអ៊ុយក្រែន។ បន្ថែមលើនេះ ប្រទេសរុស្សីបានផ្លាស់ប្តូរកងទ័ពពីតំបន់ស៊ីបេរី និងចុងបូព៌ា សម្រាប់ការធ្វើសមយុទ្ធរួមគ្នាជាមួយសម្ព័ន្ធមិត្តរបស់ខ្លួនគឺប្រទេសបេឡារុស្ស ដែលមានព្រំដែនជាប់ប្រទេសអ៊ុយក្រែន។
នៅក្នុងសមយុទ្ធទាំងនោះ អង្គភាពយោធារុស្ស៊ីបានចល័តទៅកាន់តំបន់ក្បែរព្រំដែនភាគខាងត្បូងប្រទេសបេឡារុស្ស ដែលមានចម្ងាយប្រមាណ ៧៥គីឡូម៉ែត្រពីទីក្រុងគៀវ ប្រទេសអ៊ុយក្រែន។ កាលពីដើមសប្តាហ៍នេះ ក្រសួងការពារជាតិរុស្ស៊ីបានប្រកាសអំពីសមយុទ្ធកងទ័ពជើងទឹកជាបន្តបន្ទាប់នៅក្នុងសមុទ្រខ្មៅ និងតំបន់ឆ្ងាយៗជាច្រើនទៀតដូចជាតំបន់សមុទ្រមេឌីទែរ៉ាណេ អាត្លង់ទិកភាគឦសាន និងមហាសមុទ្រប៉ាស៊ីហ្វិក។ សមយុទ្ធដែលនឹងចាប់ផ្តើមនៅខែនេះ និងបន្តរហូតដល់ខែកុម្ភៈដោយមាននាវាចូលរួមជាង ១៤០គ្រឿង យន្តហោះរាប់សិបគ្រឿង និងបុគ្គលិកជាង ១០ម៉ឺននាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
