ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច តំណាង​ដ៏​ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បាន​អញ្ជើញ​ជា​គណៈអធិបតី ក្នុងពិធីបិទវគ្គបំប៉នជំនាញស្តីពី «នីតិវិធីស្រាវ​ជ្រាវ​ស៊ើប​អង្កេត​បទ​ល្មើស​កម្ម​សិទ្ធិ​បញ្ញា» នៅស្នងការដ្ឋាននគរបាលខេត្តស្វាយរៀង។

ថ្លែងក្នុងពិធីនេះ លោកឧត្តមសេនីយ៍ឯក ចាន់ វ៉ាន់ធឿន បានប្រាប់ដល់សិក្ខាកាមទាំង ដែល​បាន​ចំណាយ​ពេល​ដ៏មានតម្លៃ ចូលរួមវគ្គបំប៉នជំនាញរយៈពេល ២ថ្ងៃចាប់ពីថ្ងៃទី១២ សល់ថ្ងៃទី១៣ ខែកញ្ញា ឆ្នាំ២០២៥នេះដោយមានការយកចិត្តទុកដាក់ស្តាប់,ការធ្វើបទបង្ហាញ និង​បក​ស្រាយ​ពី​វាគ្មិន​សំខាន់​ៗ ជំនាញពាក់ព័ន្ធនឹងបទល្មើសកម្មសិទ្ធិបញ្ញា រួមនឹងការប្រឆាំង​បទ​ល្មើស​សម្អាត​ប្រាក់​ជាដើម​។

ជាមួយគ្នានេះដែរ ឧត្តមសេនីយ៍ឯកប្រធាននាយកដ្ឋាន ក៏បាន​ផ្តាំ​ផ្ញើ​ឲ្យ​សិក្ខា​កាម​ទាំង​អស់​យកនូវ​ចំណេះ​ដឹង​ដែលខ្លួនទទួលបាននៅថ្ងៃនេះ ទៅបំពេញបន្ថែមលើចំណុចខ្វះខាត ការយល់ច្រឡំ និង​សំណូមពរចាំបាច់នានា ដើម្បីឆ្លើយតបទៅនឹងតម្រូវការ នៃការ​ប្រតិបត្តិ​ច្បាប់​ពាក់ព័ន្ធ​ជាមូល​ដ្ឋាន​ក្នុង​ការ​ពិនិត្យពិចារណា និងកែសម្រួល​លើ​ការ​អនុវត្ត​តួនាទី​ភារកិច្ច​របស់​មន្ត្រី​នគរបា​ល​យុត្តិធម៌ ឲ្យស្របតាមក្រមនីតិវីធីព្រហ្មទណ្ឌ ក៏ដូចជាស្របតាមច្បាប់ និងបទប្បញ្ញត្តិជាធរមាន ឱ្យមាន​ប្រសិទ្ធភាពខ្ពស់៕