តេក្វាន់ដូ៖ សហព័ន្ធកីឡាតេក្វាន់ដូ ITF កម្ពុជាគ្រោងបញ្ជូនអាជ្ញាកណ្ដាល-ចៅក្រម ៦រូបចូលរួមប្រឡងអាជ្ញាកណ្ដាល-ចៅក្រមអន្តរជាតិកម្រិត (B) នាពេលខាងមុខដើម្បីត្រៀមខ្លួនរៀបចំ និងកាត់សេចក្ដីក្នុងការប្រកួតកីឡាស៊ីហ្គេមលើកទី៣២ នាឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។
នេះបើតាមការបញ្ជាក់របស់លោក ប៊ួន ហ៊ីងសុធីយ៉ា អគ្គលេខាធិការសហព័ន្ធ ក្រោយបញ្ចប់វគ្គបណ្ដុះបណ្ដាលអាជ្ញាកណ្ដាល-ចៅក្រមកម្រិត «ក» កាលពីល្ងាចថ្ងៃទី២៦ ខែមករា ឆ្នាំ២០២២ ក្រោមវត្តមានឯកឧត្តម បួន លឹមហេង រដ្ឋលេខាធិការទីស្តីការគណៈរដ្ឋមន្ត្រី និងជាប្រធានកិត្តិយសសហព័ន្ធកីឡាតេក្វាន់ដូ ITF កម្ពុជា។ លោក ប៊ួន ហ៊ីងសុធីយ៉ា បានបញ្ជាក់ថា បច្ចុប្បន្នកម្ពុជាមានអាជ្ញាកណ្ដាលកម្រិតអន្ដរជាតិ ៣នាក់ ដូច្នេះត្រូវការយ៉ាងហោច ៥-៦នាក់ក្នុងនាមម្ចាស់ផ្ទះស៊ីហ្គេមឆ្នាំ២០២៣។ ហេតុនេះសហព័ន្ធនឹងចម្រាញ់អាជ្ញាកណ្ដាលកម្រិតខ្ពស់ប្រមាណ ៦រូបដើម្បីចូលរួមវគ្គបណ្ដុះបណ្ដាល និងប្រឡងអាជ្ញាកណ្ដាលអន្ដរជាតិកម្រិត (B) ដើម្បីសម្រួចផែនការត្រៀមធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រនេះ។
សូមបញ្ជាក់ថា សម្រាប់វគ្គបណ្ដុះបណ្ដាលអាជ្ញាកណ្ដាល-ចៅក្រមប្រចាំឆ្នាំនេះគឺមានសិក្ខាកាម ៣០នាក់មកពី ៩ រាជធានី-ខេត្តចូលរួម ក្រោមការបង្រៀនរបស់គ្រូឧទ្ទេសកម្រិតអន្ដរជាតិលោក Master RI CHOL NAM មកពីប្រទេសកូរ៉េខាងជើងកម្រិតខ្សែក្រវាត់ ៨ដាន់ ដែលជាប្រធានបច្ចេកទេសសហព័ន្ធតេក្វាន់ដូ ITF អាស៊ី និងជាគ្រូបង្វឹកក្រុមជម្រើសជាតិកម្ពុជា និងលោក ហ៊ឹម រីដា គ្រូបង្វឹកក្រុមជម្រើសជាតិកម្ពុជា និងជាចៅក្រមអន្តរជាតិផងដែរ។ ចំពោះលទ្ធផលនៃវគ្គបណ្តុះបណ្តាលនេះគឺសិក្ខាកាម ១០នាក់ទទួលបាននិទ្ទេសល្អ, ១២នាក់ល្អបង្គួរ និង ៨នាក់ទទួលបាននិទ្ទេសមធ្យម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
