សហរដ្ឋអាមេរិក និងចក្រភពអង់គ្លេស គ្រោងប្រកាសកិច្ចព្រមព្រៀងជាច្រើនស្តីពីបច្ចេកវិទ្យា និងថាមពលនុយក្លេអ៊ែរស៊ីវិល ក្នុងដំណើរទស្សនកិច្ចផ្លូវរដ្ឋជាលើកទីពីរដែលមិនធ្លាប់មានពីមុនមក របស់លោកប្រធានាធិបតីអាមេរិក Donald Trump នៅសប្តាហ៍នេះ ខណៈចក្រភពអង់គ្លេសសង្ឃឹមថា នឹងបញ្ចប់ការដំឡើងពន្ធដែកថែប ក្រោមកិច្ចព្រមព្រៀងពាណិជ្ជកម្មដ៏ធំ។

លោក Trump និងភរិយាលោកគឺស្រ្តីទីមួយ Melania Trump នឹងធ្វើទស្សនកិច្ច ៣ថ្ងៃ ដែលចាប់ផ្ដើមនៅថ្ងៃអង្គារ (១៦ កញ្ញា) ដល់ថ្ងៃព្រហស្បតិ៍ (១៨ កញ្ញា) ហើយនឹងត្រូវអនុញ្ញាតឱ្យចូលគាល់ព្រះមហាក្សតត្រអង់គ្លេស រួមទាំងការជិះរាជរថ ពិធីជប់លៀងផ្លូវរដ្ឋ រួមទាំងការអបអរស្វាគមន៍ដោយក្បួនយន្តហោះយោធាជាដើម។

គួរឱ្យដឹងថា គម្រោងទស្សនកិច្ចនេះគឺជារឿងមិនធ្លាប់មានពីមុនមកនោះទេ ដោយពុំដែលមានប្រធានាធិបតីអាមេរិករូបណាម្នាក់ត្រូវបានអញ្ជើញឱ្យធ្វើទស្សនកិច្ចផ្លូវរដ្ឋជាលើកទីពីរបែបនេះឡើយ។ កាលពីមុន លោក Trump បានធ្វើដំណើរទស្សនកិច្ចរដ្ឋក្នុងឆ្នាំ២០១៩ ក្នុងអំឡុងពេលអាណត្តិដំបូងរបស់លោក។

នាយករដ្ឋមន្រ្តីអង់គ្លេស លោក Keir Starmer នឹងទទួលលោក Trump នៅនិវេសនដ្ឋានរបស់លោកនាថ្ងៃព្រហស្បតិ៍ ទី១៨ ខែកញ្ញា ដើម្បីពិភាក្សាពីការងារកាន់តែជិតស្និទ្ធ លើបញ្ហាដូចជាអ៊ុយក្រែន ហើយជាមួយនឹងគោលបំណងនៃការសម្រេចចុងក្រោយលើពន្ធទាបដូចដែលសន្យា លើដែកថែប និងអាលុយមីញ៉ូម។ អ្នកនាំពាក្យមួយរូបរបស់លោក Starmer បាននិយាយថា មេដឹកនាំទាំងពីរនឹងចុះហត្ថលេខាលើ "ភាពជាដៃគូបច្ចេកវិទ្យាឈានមុខគេលើពិភពលោក" និង "កិច្ចព្រមព្រៀងនុយក្លេអ៊ែរស៊ីវិលដ៏សំខាន់" ក្នុងអំឡុងពេលដំណើរនោះ៕