ភ្នំពេញ ៖ ដោយបានទទួលការអនុញ្ញាតពីសំណាក់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញដឹកនាំគណៈប្រតិភូនគរបាលកម្ពុជា ធ្វើទស្សនកិច្ចផ្លូវការនៅសាធារណរដ្ឋកូរ៉េ ចាប់ពីថ្ងៃទី១៣ ដល់ថ្ងៃទី២០ ខែកញ្ញា ឆ្នាំ២០២៥ ក្នុងគោលបំណង ដើម្បីពង្រឹងកិច្ចសហប្រតិបត្តិការលើការងារសន្តិសុខ និងគម្រោងជំនួយ ODA រវាង បណ្ឌិត្យសភានគរបាលកម្ពុជា និងអគ្គស្នងការនគរបាលជាតិកូរ៉េ។

នៅរសៀលថ្ងៃចន្ទ ទី១៥ ខែកញ្ញា ឆ្នាំ២០២៥ នេះ ឯកឧត្តមនាយឧត្តមសេនីយ៍ ប្រធានបណ្ឌិត្យសភា បានដឹកនាំគណៈប្រតិភូ ជួបពិភាក្សាការងារជាមួយក្រុមការងារអគ្គស្នងការនគរបាលជាតិកូរ៉េ តំណាងអគ្គស្នងការនគរបាលជាតិកូរ៉េ លើកិច្ចសហប្រត្តិការរួមគ្នា នៃគម្រោងជំនួយមន្ទីរពិសោធនគរបាលទំនើបនៅកម្ពុជា ODA)។

គួរបញ្ជាក់ថា កម្ពុជា គឺជាប្រទេសទទួលជំនួយពីគម្រោងជំនួយអភិវឌ្ឍន៍ផ្លូវការ (ODA) ច្រើនជាងគេពីប្រទេសកូរ៉េក្នុងឆ្នាំ២០២៥ នេះ ដែលជាប់ចំណាត់ថ្នាក់លេខមួយក្នុងចំណោមប្រទេសជាដៃគូ ជំនួយអភិវឌ្ឍន៍ផ្លូវការ (ODA) ទាំង៩២។ បើតាមទីភ្នាក់ងារប្រតិបត្ដិការអន្តរជាតិកូរ៉េ (KOICA) បានឱ្យដឹងថា នៅឆ្នាំ២០២៥ នេះ រដ្ឋាភិបាលកូរ៉េត្រូវបានគេរំពឹងថា នឹងផ្តល់ជំនួយប្រមាណ ៣៥០ លានដុល្លារដល់កម្ពុជា ដោយផ្តោតលើវិស័យដូចជា ការអប់រំ ការគ្រប់គ្រងទឹក សុខភាព និងអនាម័យ វិស័យដឹកជញ្ជូន និងការអភិវឌ្ឍន៍ជនបទ។ ជាក់ស្តែង ជំនួយនេះនឹងរួមមានកម្ចីសម្បទានចំនួន ២៧គម្រោង ក្នុងនោះគម្រោងសាងសង់ស្ពានមិត្តភាពកម្ពុជា-កូរ៉េ និងគម្រោងជំនួយឥតសំណងចំនួន ៦២គម្រោង រួមទាំងគម្រោងកសាងសមត្ថភាពសម្រាប់មន្ទីរពេទ្យកុមារជាតិ៕