ដំណាក់កាលចុងក្រោយនៃការប្រណាំងកង់កម្មវិធធី Vuelta a Espana (វ៉ុលអែលតា អា អេស្ប៉ាណា) ត្រូវបានផ្អាក កាលពីថ្ងៃអាទិត្យ (ទី១៤ ខែកញ្ញា) ដោយសារតែមានការតវ៉ាគាំទ្រប៉ាឡេស្ទីនដ៏ធំ នៅទីក្រុងម៉ាឌ្រីដ។ អ្នកសារព័ត៌មានបានផ្ដិតយករូបភាពបាតុកររាប់ពាន់នាក់ ដែលបានប្រមូលផ្តុំគ្នានៅក្នុងរដ្ឋធានីរបស់អេស្ប៉ាញ ដោយបានលុកលុយកន្លែងដែលការប្រណាំងកង់ត្រូវឆ្លងកាត់ នៅកណ្តាលទីក្រុងនេះ។

នៅលើវិថី Gran Via ជាកន្លែងដែលកីឡាករប្រណាំងកង់ត្រូវឆ្លងកាត់ច្រើនដង ក្រុមបាតុករបាននាំគាំធ្វើឲ្យរនាំងដួលរប៉ាត់រប៉ាយ និងដើរដង្ហែរចូលទៅផ្លូវនេះ ដោយខ្លះស្រែកឲ្យធ្វើពហិការ ចំពោះអ៊ីស្រាអែល ខណៈដែលផ្សែងពណ៌បៃតង និងក្រហមហុយទ្រលោមពេញអាកាស។ នៅជិត Atocha ដែលជាស្ថានីយ៍រថភ្លើងកណ្តាលទីក្រុងម៉ាឌ្រីដ នគរបាលបានចោទប្រកាន់ក្រុមបាតុករ និងបានបាញ់ឧស្ម័នបង្ហូរទឹកភ្នែកដាក់ពួកគេ មុនពេលអនុញ្ញាតឲ្យពួកគេដើរចូលទៅក្នុងផ្លូវ។

កីឡាការនានា ដែលស្ថិតនៅចម្ងាយប្រហែល ៥៦គីឡូម៉ែត្រពីទីព្រ័ត្រ បានឈប់មុនពេលកម្មវិធី Vuelta ត្រូវបានលុបចោល។ ដំណាក់កាលផ្សេងៗនៃកម្មវិធី ត្រូវបានកាត់បន្ថយដោយសារតែការតវ៉ា ដែលភាគច្រើនប្រឆាំងនឹងការចូលរួមរបស់ក្រុម Israel-Premier Tech។

ការតវ៉ាក៏បាននាំឲ្យមានភាពតានតឹងដល់ការប្រណាំងដ៏ធំរយៈពេល ៣សប្តាហ៍នេះ ដែលរួមមានទាំងគ្រោះថ្នាក់ដួលផងដែរ។ នាយករដ្ឋមន្រ្តីអេស្ប៉ាញ លោក Pedro Sanchez បាននិយាយនៅមុនពេលការប្រណាំងបានចាប់ផ្តើមកាលពីថ្ងៃអាទិត្យថា ការតវ៉ាបានធ្វើឲ្យលោកមាន «មោទនភាព»។

សមាជិកមួយចំនួននៃរដ្ឋាភិបាលឆ្វេងនិយមរបស់ប្រទេសអេស្ប៉ាញ បានគាំទ្រជាសាធារណៈ ចំពោះចលនានេះនៅក្នុងប្រទេសដែលការគាំទ្រសម្រាប់បុព្វហេតុប៉ាឡេស្ទីន គឺមានកម្រិតខ្លាំងក្លា៕