មនុស្ស ៨នាក់ ស្លាប់ និងមនុស្ស ៤៤នាក់ផ្សេងទៀត រងរបួស ពេលដែលរថយន្តក្រុងដឹកបុគ្គលិកមន្ទីរពេទ្យ និងសមាជិកក្រុមគ្រួសាររបស់ពួកគេជួបគ្រោះថ្នាក់ចរាចរណ៍នៅជិតភ្នំ Bromo ស្ថិតក្នុងខេត្តជ្វាខាងកើត ប្រទសឥណ្ឌូនេស៊ី កាលពីថ្ងៃអាទិត្យ ។

យោងតាមសេចក្តីរាយការណ៍របស់សារព័ត៌មាន Jakarta Globe បានឲ្យដឹងថា អ្នកដំណើរ ៥២នាក់ គឺជាបុគ្គលិកមន្ទីរពេទ្យ Bina Sehat ស្ថិតក្នុងទីក្រុង Jember ខេត្តជ្វាខាងកើត ហើយនិងជាសមាជិកគ្រួសាររបស់ពួកគេ ។ ពួកគេវិលត្រឡប់ពីដំណើរកម្សាន្តក្នុងថ្ងៃឈប់សម្រាករបស់ពួកគេទៅកាន់ភ្នំ Mount ដែលជាតំបន់ទេសចរណ៍ភ្នំភ្លើងដ៏ពេញនិយមមួយសម្រាប់ភ្ញៀវទេសចរ និងជាទីដែលមានទេសភាពស្អាតដ៏ស្រស់ត្រកាល ។

មនុស្ស ៧នាក់ ក្នុងចំណោមអ្នកស្លាប់ ត្រូវបានកំណត់អត្តសញ្ញាណ ។ ពួកគេមានអាយុចន្លោះពី ៧ឆ្នាំ ដល់ ៣៩ឆ្នាំ ហើយ ៣នាក់ក្នុងចំណោមពួកគេ គឺជាសមាជិកគ្រួសារតែមួយ ។

ឧបទ្ទេវហេតុគ្រោះថ្នាក់ដែលបានកើតឡើងនៅក្នុងទីក្រុង Probolinggo នេះដែរ កំពុងស្ថិតក្រោមការស៊ើបអង្កេត ។

យោងតាមការអះអាងរបស់នគរបាល បានឲ្យដឹងថា អ្នកបើកបរឈ្មោះ Albahri វ័យ ៥៩ឆ្នាំ បាននៅរស់ ហើយលោកនិយាយប្រាប់ក្រុមអ្នកស៊ើបអង្កេតថា រថយន្តបានដាច់ហ្វ្រាំង ។

នៅក្នុងការផ្តល់ចម្លើយរបស់គាត់ លោក Albahri និយាយថា លោកបានជាន់ហ្រ្វាំង ប៉ុន្តែវាពុំដំណើរនោះទេ ។ ដោយការភិតភ័យ លោកក៏បានបួងចង្កូតរថយន្តទៅបុករបាំងផ្លូវ ដើម្បីការពាររថយន្តពីការធ្លាក់ចូលក្នុងជ្រោះ ៕