មនុស្សយ៉ាងហោចណាស់ ៩នាក់ រួមមានទាំងកុមារ ៥នាក់ផងដែរ បានបាត់បង់ជីវិត នៅក្នុងបំណាក់ដីចំនួន ២ ដាច់ដោយឡែកពីគ្នា នៅទៅក្រុង Kota Kinabalu និង Papar នាព្រឹកថ្ងៃចន្ទ (ទី១៥ ខែកញ្ញា) នេះ បន្ទាប់ពីមានភ្លៀងធ្លាក់ខ្លាំងពេញមួយយប់។

ស្នងការនគរបាលទីក្រុង Kota Kinabalu លោក ACP Kasim Muda បាននិយាយថា ជនរងគ្រោះ ៧នាក់ត្រូវបានប្រទះឃើញថា ស្លាប់ បន្ទាប់ពីមានបំណាក់ដីនៅផ្ទះមួយខ្នង ក្នុងភូមិ Kampung Cenderakasih នៃតំបន់ Kolombong ក្នុងទីក្រុង Inanam នៅវេលាម៉ោងប្រហែល ៩:១៥នាទីព្រឹក ម៉ោងក្នុងស្រុក។

លោក Muda បានប្រាប់ថា ជនរងគ្រោះ រួមមានក្មេងប្រុស ៣នាក់ និងក្មេងស្រីម្នាក់ អាយុចន្លោះពី ២ ទៅ ៩ឆ្នាំ ព្រមទាំងស្ត្រី ២នាក់ និងបុរសម្នាក់ អាយុចន្លោះ ពី ២៥ ទៅ ៥០ឆ្នាំ។ លោកស្នងការរូបនេះ បាននិយាយទៅកាន់អ្នកសារព័ត៌មាននៅកន្លែងកើតហេតុថា៖ «មនុស្សសរុបចំនួន ១១នាក់ បានពាក់ព័ន្ធនឹងគ្រោះថ្នាក់ដោយសារបំណាក់ដីនេះ ។ ៤នាក់ បានរួចជីវិត ក្នុងនោះមានម្នាក់បាក់ជើង»។

ប្រធាននាយកដ្ឋានពន្លត់អគ្គិភ័យ និងសង្គ្រោះរបស់រដ្ឋ លោក Mohd Pisar Aziz បាននិយាយថា ការហៅទូរសព្ទប្រាប់ពីហេតុការណ៍នេះ ត្រូវបានទទួលនៅម៉ោង ១០:០២នាទីព្រឹក (ម៉ោងក្នុងស្រុក) ដោយក្រុមមួយបានមកដល់កន្លែងកើតហេតុនៅម៉ោង ១0:២៤នាទីព្រឹក (ម៉ោងក្នុងស្រុក)។ បុគ្គលិកពន្លត់អគ្គិភ័យសរុបចំនួន ២៤នាក់ មកពីស្ថានីយ៍ Lintas និង Tuaran ត្រូវបានដាក់ពង្រាយក្នុងប្រតិបត្តិការស្វែងរក និងជួយសង្គ្រោះ។

ចំណែកនៅទីក្រុង Papar ស្ត្រីអាយុ ៣៨ឆ្នាំ និងក្មេងប្រុសអាយុ ១១ឆ្នាំម្នាក់ បានបាត់បង់ជីវិត ដោយសារបំណាក់ដី កើតមាននៅផ្ទះរបស់ពួកគេ ក្នុងភូមិ Kampung Mook។ លោក Mohd Pisar បាននិយាយថា ជនរងគ្រោះទាំង ២នាក់ ត្រូវបានទាញឡើង ក្រោយប្រើពេលជិត ៤ម៉ោង ហើយត្រូវបានបុគ្គលិកពេទ្យបញ្ជាក់ថា បានស្លាប់ហើយនៅកន្លែងកើតហេតុ៕