បន្ទាប់ពីការលុកលុយពីយានដ្រូនរបស់រុស្ស៊ី កាលពីសប្តាហ៍មុន ចូលទៅក្នុងដែនអាកាសប៉ូឡូញ និងរ៉ូម៉ានី រដ្ឋមន្ត្រីការបរទេសប៉ូឡូញ លោក Radosław Sikorski បានអំពាវនាវឲ្យអង្គការណាតូ (NATO) និងសហភាពអឺរ៉ុប (EU) បង្កើតតំបន់គ្មានការហោះហើរនៅពីលើអ៊ុយក្រែន ដើម្បីការពារកុំឲ្យមានការរំលោភលើផ្ទៃមេឃរបស់អឺរ៉ុបបន្ថែមទៀត។

កាលពីថ្ងៃអាទិត្យ (ទី១៤ ខែកញ្ញា) លោក Sikorski បានប្រាប់សារព័ត៌មាន Frankfurter Allgemeine Zeitung ថា៖ «ប្រសិនបើអ្នកសួរខ្ញុំផ្ទាល់ ខ្ញុំគិតថា យើងគួរតែពិចារណាអំពីវា។ តាមលក្ខណៈបច្ចេកទេស យើងជាអង្គការណាតូ និងសហភាពអឺរ៉ុប នឹងមានអាចបង្កើតវាបាន ប៉ុន្តែនេះមិនមែនជាការសម្រេចចិត្តដែលប៉ូឡូញអាចធ្វើតែម្នាក់ឯងបានទេ គឺមានតែជាមួយសម្ព័ន្ធមិត្តប៉ុណ្ណោះ»។

អំឡុងពេលថ្លែងដាច់ដោយឡែកទៅកាន់សារព័ត៌មាន Kyiv Independent លោក Sikorski បាននិយាយថា ការលុកលុយដែលមិនធ្លាប់មានពីមុនមកនៃយានដ្រូនរបស់រុស្ស៊ីចំនួន ១៩គ្រឿង ចូលទៅក្នុងដែនអាកាសរបស់ប្រទេសប៉ូឡូញ កាលពីសប្តាហ៍មុន បាននាំឲ្យមានការពិភាក្សាថ្មីៗ ស្ដីពីលទ្ធភាពនៃការបង្កើតតំបន់គ្មានការហោះហើរដោយអង្គការណាតូលើតំបន់ខ្លះរបស់អ៊ុយក្រែន ដោយបន្ថែមថា ទស្សនៈ ក្នុងចំណោមបណ្ដាមេដឹកនាំអឺរ៉ុប កំពុង «ផ្លាស់ឆ្ពោះទៅរកគំនិតនេះ»។

អ៊ុយក្រែនបានអំពាវនាវមុនគេបង្អស់ទៅកាន់អង្គការណាតូឲ្យបង្កើតតំបន់គ្មានការហោះហើរ ដើម្បីការពារពលរដ្ឋរបស់ខ្លួនពីការវាយប្រហារតាមអាកាសរបស់រុស្ស៊ី តាំងពីប៉ុន្មានសប្តាហ៍ដំបូងនៃការលុកលុយទ្រង់ទ្រាយធំ ក្នុងឆ្នាំ២០២២ ប៉ុន្តែសម្ព័ន្ធមិត្តបានច្រានចោលសំណើនេះ ដោយផ្ដល់ហេតុផលថា ការធ្វើដូច្នេះ នឹងធ្វើឲ្យសង្គ្រាមកើនឡើងហួសពីព្រំដែនអ៊ុយក្រែន៕