របាយការណ៍ បានព្រមាននៅថ្ងៃចន្ទនេះថា នីរ៉ូទឹកមហាសមុទ្រកើនឡើង និងការជន់លិចបណ្តាលមកពីបម្រែបម្រួលអាកាសធាតុ នឹងគំរាមកំហែងដល់ផ្ទះប្រជាពលរដ្ឋ និងការរស់នៅប្រចាំថ្ងៃរបស់ពលរដ្ឋអូស្រ្តាលីជាង ១លាននាក់ នៅឆ្នាំ ២០៥០ ខណៈការស្លាប់ដោយសារជំងឺពាក់ព័ន្ធនឹងកម្តៅ នឹងកើនឡើងដូចគ្នា ។

ការវាយតម្លៃហានិភ័យអាកាសធាតុរង់ចាំជាយូរដែលនឹងបញ្ចេញនៅក្នុងសប្តាហ៍នេះ បានរកឃើញថា សីតុណ្ហភាពកើនឡើង មានផលប៉ះពាល់រួមផ្សំដល់ជីវិតមនុស្សនៅអូស្រ្តាលីដែលមានពលរដ្ឋរស់នៅជាង ២៧លាននាក់ ។

លោក Chris Bowen គឺជារដ្ឋមន្រ្តីអាកាសធាតុអូស្រ្តាលី និយាយថា បច្ចុប្បន្នពួកយើងរស់នៅក្នុងបម្រែបម្រួលអាកាសធាតុ ។ វាលែងជាការព្យាករទៀតហើយ វាគឺជាការពិតនៃជីវិត ហើយវាយឺតណាស់ទៅហើយ ដើម្បីចៀសផុតពីផលប៉ះពាល់មួយនេះ ។

របាយការណ៍ដែលរៀបចំឡើងដោយឯករាជ្យសម្រាប់រដ្ឋាភិបាលអូស្រ្តាលី រកឃើញថា មនុស្ស ១,៥លាននាក់ រស់នៅតាមតំបន់ឆ្នេរ នឹងប្រឈមនឹងការឡើងកម្រិតនីវ៉ូទឹកសមុទ្រ ហើយការជន់លិចតាមតំបន់ឆ្នេរនៅឆ្នាំ ២០៥០ ។ នៅឆ្នាំ ២០៩០ មនុស្សប្រហែល ៣លាននាក់ នឹងប្រឈមហានិភ័យនៃកើនឡើងនីវ៉ូទឹកមហាសមុទ្រនៅទីនោះ ។

ការកើនឡើងនីវ៉ូទឹកសមុទ្រ ក្លាយជាការគំរាមកំហែងធំដល់ផ្ទះសម្បែង ការរស់នៅប្រចាំថ្ងៃ និងការតភ្ជាប់វប្បធម៌ ពិសេសនៅតាមតំបន់ជាច្រើន ដូចជាកោះច្រកសមុទ្រ Torres ។

តាមរយៈការឡើងកម្តៅទឹកសមុទ្រនេះដែរ តំបន់ចុងឧត្តរបស់អូស្រា្តលី កោះដែលមានពលរដ្ឋរស់នៅច្រើន រងការគំរាមកំហែងដោយសារការកើនឡើងនីវ៉ូទឹកសមុទ្រលឿនជាងកម្រិតមធ្យមសកល ។

របាយការណ៍នៅថ្ងៃចន្ទនេះ បានកើតមានឡើង ពេលដែលអូស្រ្តាលី គ្រោងនឹងបញ្ចេញជុំបន្ទាប់នៃគោលដៅកាត់បន្ថយការបំភាយឧស្ម័នរបស់ខ្លួន ក្នុងរយៈពេលប៉ុន្មានសប្តាហ៍ខាងមុខនេះ គឺជាកាតព្វកិច្ចដ៏សំខាន់មួយស្ថិតក្រោមកិច្ចព្រមព្រៀងអាកាសធាតុក្រុងប៉ារីស ៕