នៅតាមបណ្តោយឆ្នេរទីក្រុង Lagos ប្រទេសនីហ្សេរីយ៉ា សត្វកន្ធាយសមុទ្រជិតផុតពូជ ធ្វើចលនា ដើម្បីបំផ្លាស់ទីដោយគ្មានកម្លាំង ពេលដែលអ្នកស្រុកចោមរោមចាប់ពួកវា ។

ទិដ្ឋភាពបែបនេះ ស្រដៀងគ្នានឹងទិដ្ឋភាពផ្សេងទៀតនៅតាមបណ្តាយឆ្នេរសមុទ្រនីហ្សេរីយ៉ា ជាទីដែលសត្វកន្ធាយសមុទ្របុរាណទាំងអស់នេះ ប្រឈមនឹងការគំរាមកំហែងកើនឡើង ពីសំណាញ់នេសាទ ការបាត់បង់ទីជម្រក ការទទួលទានរបស់មនុស្ស និងការប្រើប្រាស់ទំនៀមទម្លាប់បែបប្រពៃណី ។

លោក Morufu Yusuf គឺជាអ្នកនេសាទក្នុងស្រុកមួយរូបនិយាយថា ពេលដែលកន្ធាយបំលាស់ទីទៅកាន់ដីស្ងួតនៅតាមបណ្តោយឆ្នេរ ដើម្បីក្រាបពង ហើយពួកយើងឃើញវា ពួកយើងនឹងចាប់វា ។ ពួកយើងយកពង និងសម្លាប់វា ដើម្បីបរិភោគ ។

អ្នកស្រី Morifat Hassan គឺជាអ្នកលក់ត្រីក្នុងស្រុកម្នាក់ និយាយដែរថា កន្ធាយសមុទ្រមានតម្លៃខ្លាំងណាស់ ៦០ដុល្លារ ក្នុង ១ក្បាល ហើយជួនកាល អ្នកនេសាទចាប់វាបាន ៣-៤ក្បាល ហើយពេលពួកគេត្រឡប់មកវិញ ពួកយើងក៏ទទួលទិញវាតាមតម្លៃតូច-ធំ ។

ប៉ុន្តែរឿងរ៉ាវរបស់សត្វកន្ធាយសមុទ្រទាំងនេះ នឹងមិនចប់ដូចដែលអ្នករាល់គ្នានិយាយនោះទេ ។ លោក Chinedu Mogbo គឺជាអ្នកអភិរក្សមួយរូប និងជាស្ថាបនិកបង្កើតគំនិតផ្តួចផ្តើមសត្វព្រៃ Greenfingers បានធ្វើដំណើរមកចរចាអ្វីដែលជាភាពខុសប្លែកគ្នារវាងជីវិត និងសេចក្តីស្លាប់ដែលបានធ្វើឲ្យចំនួនសត្វកន្ធាយសមុទ្រធ្លាក់ចុះរួចទៅហើយ ។

ក្រោយពីចរចារួច លោក Mogbo បានលើកដោយប្រុងប្រយ័ត្នសត្វកន្ធាយសមុទ្រទាំងនេះ រួចនាំវាទៅកាន់ជម្រករបស់លោក ។

លោកនិយាយថា សត្វកន្ធាយនេះ មានរបួស ពួកយើងនឹងយកវាទៅកន្លែងចិញ្ចឹមរបស់ពួកយើង ជាទីដែលត្រូវព្យាបាលវា មុនពេលបញ្ជូនវាចូលទៅក្នុងសមុទ្រវិញ ៕