រុស្ស៊ី បាបង្ហាញពីអាវុធទំនើបៗមួយចំនួនខណៈធ្វើសមយុទ្ធយោធារួមគ្នាជាមួយបេឡារុស ស្របពេលភាពតានតឹងខ្លាំងជាមួយបណ្ដាប្រទេសក្នុងសម្ព័ន្ធយោធាណាតូ ក្រោយប៉ូឡូញ និងបេឡារុស អះអាងថាយានដ្រូនរុស្ស៊ីបំពានដែនអាកាសរបស់ខ្លួន។

ទាហានប្រហែល៧.០០០នាក់ រួមទាំងទាហានបេឡារុសចំនួន៦.០០០នាក់ បានចូលរួមសមយុទ្ធ។

ខណៈសម្ព័ន្ធមិត្តណាតូរបស់អាមេរិកនៅអឺរ៉ុបកំពុងរងសម្ពាធពីទីក្រុងមូស្គូ ដោយដាក់ពួកគេនៅក្នុងបរិយាកាសដ៏ក្តៅគគុកជាមួយនឹងយានដ្រូនរបស់រុស្ស៊ីចូលក្នុងដែនអាកាសរបស់ប៉ូឡូញ រុស្ស៊ី និងសម្ព័ន្ធមិត្តដ៏សំខាន់របស់ខ្លួនគឺបេឡារុស កំពុងធ្វើសមយុទ្ធយោធាដ៏ធំនៅមាត់ទ្វាររបស់សម្ព័ន្ធភាពនេះ។

សមយុទ្ធដែលមានឈ្មោះថា Zapad-2025 កំពុងធ្វើឡើងនៅទីលានហ្វឹកហាត់ក្នុងប្រទេសរុស្ស៊ី និងបេឡារុស ដែលប្រទេសទាំងពីរជាប់ព្រំដែនអ៊ុយក្រែន ក៏ដូចជានៅក្នុងដែនទឹកនៃសមុទ្របាល់ទិក និងសមុទ្រ Barents។

គណៈប្រតិភូមន្ត្រីយោធាអាមេរិក ក៏ដូចជាតំណាងសមាជិកអង្គការណាតូពីរផ្សេងទៀត គឺទួរគី និងហុងគ្រី បានចូលរួមជាអ្នកសង្កេតការណ៍សមយុទ្ធនេះ អមដោយអនុរដ្ឋមន្ត្រីការពារជាតិរុស្ស៊ីលោក Yunus-Bek Yevkurov។

នៅពេលសមយុទ្ធបានចាប់ផ្តើមនៅបរិវេណដ៏ធំនៅភាគខាងជើងនៃទីក្រុង មីនស៍ (Minsk )ក្រសួងការពារជាតិបេឡារុស បានអះអាងថា អង្គការណាតូកំពុងភ័យស្លន់ស្លោចំពោះមុខ នៃអំណាចកម្លាំងរបស់រុស្ស៊ី និងបេឡារុស។ការបង្ហាញកម្លាំងខាងយោធារបស់រុស្ស៊ី និងបេឡារុស ត្រូវគេមើលឃើញថាទំនងជាសារមួយទៅកាន់សហភាពអឺរ៉ុប៕