ប្រធានាធិបតីសហរដ្ឋអាមេរិក លោក Donald Trump បានព្រមានក្រុមហាម៉ាស ប្រឆាំងនឹងការផ្លាស់ប្តូរទីតាំងចំណាប់ខ្មាំងជនជាតិអ៊ីស្រាអែលនៅលើដីក្នុងតំបន់ហ្កាហ្សា ដើម្បីរារាំងយុទ្ធនាការយោធារបស់អ៊ីស្រាអែល ដោយបន្តការអំពាវនាវរបស់លោកឱ្យដោះលែងពួកគេ។

លោក Trump បានសរសេរនៅក្នុងការបង្ហោះលើបណ្តាញផ្សព្វផ្សាយសង្គមកាលពីថ្ងៃចន្ទថា លោកបានអានរបាយការណ៍ព័ត៌មានដែលបង្ហាញថាក្រុមហាម៉ាសនឹងប្រើប្រាស់ឈ្លើយសឹកជា «ខែលការពារមនុស្ស» ក្នុងពេលមានការទម្លាក់គ្រាប់បែកឥតឈប់ឈររបស់អ៊ីស្រាអែល នៅតំបន់ហ្កាហ្សា។

ប្រធានាធិបតីសហរដ្ឋអាមេរិកនិយាយថា «ខ្ញុំសង្ឃឹមថាមេដឹកនាំក្រុមហាម៉ាស ដឹងពីអ្វីដែលពួកគេនឹងទទួលប្រសិនបើពួកគេធ្វើរឿងបែបនេះ»។

 លោក Trump តែងតែបង្ហោះការគំរាមកំហែងប្រឆាំងនឹងក្រុមហាម៉ាសជាញឹកញាប់។ ប៉ុន្តែដោយមេដឹកនាំភាគច្រើនរបស់ក្រុមនេះត្រូវបានសម្លាប់ ហើយអ៊ីស្រាអែលបានបំផ្លាញតំបន់ហ្កាហ្សាភាគច្រើននៅក្នុងយុទ្ធនាការដែលអ្នកជំនាញនិងក្រុមសិទ្ធិមនុស្សនិយាយថាជាអំពើប្រល័យពូជសាសន៍ វាមិនច្បាស់នោះទេថា ប្រធានាធិបតីសហរដ្ឋអាមេរិករូបនេះ អាចដាក់ទណ្ឌកម្មបន្ថែមទៅលើក្រុមហាម៉ាសយ៉ាងដូចម្តេចនោះ។ ក្នុងប៉ុន្មានសប្តាហ៍ថ្មីៗនេះ អ៊ីស្រាអែលបាននិងកំពុងអនុវត្តយុទ្ធនាការជាប្រព័ន្ធដើម្បីកម្ទេចអ្វីដែលនៅសេសសល់ក្នុងទីក្រុងហ្កាហ្សា ដោយផ្តោតលើអគារលំនៅឋាន សាលារៀន និងបង្ខំឱ្យមានការជម្លៀសប្រជាជនទ្រង់ទ្រាយធំចេញពីតំបន់នោះ។ បេសកជនពិសេសរបស់អង្គការសហប្រជាជាតិបាននិយាយកាលពីថ្ងៃចន្ទថា ការវាយលុកនេះគឺជាផ្នែកមួយនៃយុទ្ធនាការរាលដាលនៃការបោសសម្អាតជនជាតិភាគតិច។