លោកប្រធានាធិបតី Donald Trump បានប្រកាសថា យោធាសហរដ្ឋអាមេរិក បានវាយប្រហារលើអ្វីដែលលោកបាននិយាយថា ជានាវារបស់ក្រុមជួញដូរគ្រឿងញៀនវេណេស៊ុយអេឡា ដែលបានធ្វើដំណើរទៅកាន់សហរដ្ឋអាមេរិក។ មនុស្សបីនាក់ត្រូវបានសម្លាប់ក្នុងការវាយប្រហារកាលពីថ្ងៃចន្ទ នេះបើយោងតាមលោក Trump ជាអ្នកដែលបាននិយាយថាការវាយប្រហារបានកើតឡើងនៅលើដែនទឹកអន្តរជាតិ។

លោក Trump បាននិយាយនៅក្នុងការបង្ហោះនៅលើបណ្តាញសង្គម Truth Social ថា «នៅព្រឹកនេះ តាមបញ្ជារបស់ខ្ញុំ កងកម្លាំងយោធាសហរដ្ឋអាមេរិកបានធ្វើការវាយប្រហារនាវាទីពីរប្រឆាំងនឹងក្រុមជួញដូរគ្រឿងញៀនហិង្សានិងក្រុមភេរវករគ្រឿងញៀនដែលត្រូវបានកំណត់អត្តសញ្ញាណ» ។

ក្រុមជួញដូរគ្រឿងញៀនហិង្សាដ៏ខ្លាំងក្លាបំផុតទាំងនេះ បានបង្កការគំរាមកំហែងដល់សន្តិសុខជាតិសហរដ្ឋអាមេរិក គោលនយោបាយការបរទេស និងផលប្រយោជន៍សំខាន់ៗរបស់សហរដ្ឋអាមេរិក។

ការវាយប្រហារនេះ ធ្វើឡើងបន្ទាប់ពីការវាយប្រហារស្រដៀងគ្នាដែលបានសម្លាប់មនុស្ស១១នាក់កាលពីដើមខែនេះ។ ការទម្លាក់គ្រាប់បែកលើកដំបូង បានធ្វើឱ្យកាន់ជ្រៅនូវភាពមិនចុះសម្រុងគ្នារវាងទីក្រុងវ៉ាស៊ីនតោន និងទីក្រុងការ៉ាកាស។

ការវាយប្រហារនេះក៏បានបង្កើនការព្រួយបារម្ភអំពីការរំលោភច្បាប់អន្តរជាតិ និងសិទ្ធិរបស់បុគ្គលគោលដៅដែលត្រូវបានប្រហារជីវិតនៅក្រៅប្រព័ន្ធតុលាការដោយគ្មាននីតិវិធីត្រឹមត្រូវ។ ក្រុមអ្នករិះគន់មួយចំនួនបានចោទសួរថាហេតុអ្វីបានជាក្រុមអ្នកជួញដូរគ្រឿងញៀនដែលត្រូវបានចោទប្រកាន់មិនត្រូវបានចាប់ខ្លួនដើម្បីឲ្យប្រឈមមុខនឹងបទចោទប្រកាន់តាមផ្លូវច្បាប់ នៅពេលដែលពួកគេទៅដល់ដែនទឹកសហរដ្ឋអាមេរិក។