ប្រធានក្រុមការងារគណបក្សចុះមូលដ្ឋានស្រុកសន្ទុក និង​ក្រុម​ការងារ​ចុះមូលដ្ឋាន​នៅ​តាម​បណ្តា​ឃុំ​ទូទាំង​ស្រុក អញ្ជើញចូលរួម កាន់បិណ្ឌទី៩ ជាមួយពុទ្ធបរិស័ទចំណុះជើងវត្តកំពង់ថ្ម និងវត្តសង់​ឃ្លាំង​ ស្ថិតនៅស្រុកសន្ទុក ខេត្តកំពង់ធំ តាមទំនៀមទម្លាប់បែប សាសនា។

លោកជំទាវបណ្ឌិត ជា សិរី សមាជិក​គណៈ​អចិន្ត្រៃយ៍​គណៈកម្មាធិការ​កណ្តាល​គណបក្ស​ប្រជាជន​កម្ពុជា និងជាប្រធានក្រុម ការងារគណបក្សចុះមូលដ្ឋានស្រុកសន្ទុក និងក្រុមការងារ​ចុះ​បណ្តា​ឃុំ​ផ្សេង​ៗទូទាំងស្រុក នៅថ្ងៃថ្ងៃ១៦ ខែកញ្ញា ឆ្នាំ២០២៥នេះ បាន អញ្ជើញចូល​រួម​កាន់​បិណ្ឌ​ទី៩ ជាមួយប្រជាពុទ្ធបរិស័ទចំណុះជើងវត្តកំពង់ថ្ម និងវត្តសង់ឃ្លាំង ស្ថិតនៅស្រុកសន្ទុក ខេត្ត​កំពង់ធំ, ដែល ពិធីបុណ្យកាន់បិណ្ឌនេះ ត្រូវបានរៀបចំឡើងតាមប្រពៃណីព្រះពុទ្ធសាសនា ក្នុង​គោលបំណងទំនុកបម្រុង និងចាត់ចែងចង្ហាន់ និងបច្ច័យ៤ ប្រគេនព្រះសង្ឃគង់ចាំព្រះវស្សា និង​ការ​ឧទ្ទិសកុសលផលបុណ្យដល់ដួងវិញ្ញាណខន្ធអ្នកដែលបាក់បែកចែកឋាន។

ក្នុងពិធីកាន់បិណ្ឌនេះដែរ, លោកជំទាវបណ្ឌិត ក៏បាន​ឧទ្ទិស​មហា​កុសល​ផល​បុណ្យ​ជូន​ដល់​ដួង​វិញ្ញាណ​ក្ខន្ធ ឯកឧត្តម ជា ចាន់តូ អតីតទេសាភិបាលកិត្តិយសធនាគារជាតិនៃកម្ពុជា និង​បុព្វ​ការី​ជន​ ទាំងឡាយមានមាតាបិតាជីដូនជីតា យុទ្ធជន យុទ្ធនារី ដែល បានពលីជីវិត ដើម្បីជាតិ​មាតុ​ភូមិ​ និងសាសនា ក៏ដូចជាចូលរួមចំណែករឹតចំណងសាមគ្គីភាព និងលើកតម្កើងព្រះពុទ្ធសាសនា ឱ្យ​កា​ន់តែរុងរឿង អស់កាលជាអង្វែងតរៀងទៅ។

នៅក្នុងថ្ងៃកាន់បិណ្ឌទី៩នេះ លោកជំទាវបណ្ឌិត ជា សិរី បាន​ប្រគេន​បច្ច័យ​មួយ​ចំនួន​ដល់​វត្ត​ទាំង​ពីរ​ គឺវត្តកំពង់ថ្ម និងវត្តសង់ ឃ្លាំង សម្រាប់ទុកកសាងសមិទ្ធផលនានានៅក្នុងវត្តទាំងពីរខាងលើ ដើម្បី​ចូល​រួមដល់ការរីកចម្រើននៅក្នុងវិស័យពុទ្ធចក្រ នៃព្រះរាជា ណាចក្រកម្ពុជា។

សូមជម្រាបថា, ពិធីបុណ្យភ្ជុំបិណ្ឌនេះ គឺជាពិធីបុណ្យមួយដែលធំជាងគេ នៅក្នុង​ចំណោម​ពិធី​បុណ្យ​ទាំង​អស់ ចំពោះអ្នកកាន់ព្រះពុទ្ធ សាសនា ដែលជារៀងរាល់ឆ្នាំនៅពេលដល់ថ្ងៃដល់ខែ ដែល​ត្រូវ​ប្រារព្ធ​ពិធីបុណ្យភ្ជុំបិណ្ឌ បងប្អូន-កូនចៅ សាច់ញាតិសន្ដានទាំងអស់ ទោះនៅទី​ជិត​ឬ​ទី​ឆ្ងាយ ​តែងតែធ្វើដំណើរទៅជួបជុំគ្នា ជាពិសេសឪពុកម្ដាយនៅស្រុកកណើត ដើម្បីរៀប​ចំ​ម្ហូប​អាហារ ​បាយសម្ល យក ទៅប្រគេនព្រះសង្ឃដែលគង់នៅវត្តអារាម, ទាំងនេះគឺ​ជា​ទម្លាប់​មួយ​ដែល​គេ​និយម​ធ្វើតៗគ្នារបស់ជនជាតិខ្មែរជាយូរមកហើយ៕ អត្ថបទ៖ សុន រ៉ាឌី