ដោយដកស្រង់សម្តីពីមន្ត្រីអ៊ីស្រាអែល សារព័ត៌មាន Axios បានរាយការណ៍ថា យោធាអ៊ីស្រាអែល បានបើកការវាយលុកផ្លូវគោក កាលពីថ្ងៃចន្ទ (ទី១៥ ខែកញ្ញា) ដើម្បីដណ្តើមកាន់កាប់ទីក្រុងហ្កាហ្សា ដែលជាមជ្ឈមណ្ឌលទីក្រុងដ៏ធំបំផុតរបស់តំបន់ដែនដីនេះ។

យោធាអ៊ីស្រាអែលមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយលើសេចក្ដីរាយការណ៍ ជុំវិញការចំណាត់ការនេះ ដែលកើតឡើងបន្ទាប់ពីប៉ុន្មានសប្ដាហ៍នៃការវាយប្រហារយ៉ាងខ្លាំងក្លារបស់អ៊ីស្រាអែលលើទីក្រុងមួយនេះ។ នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឲ្យយោធា កាលពីខែមុន ដើម្បីដណ្តើមកាន់កាប់ទីក្រុងហ្កាហ្សា ដែលលោកបានពិពណ៌នាថា ជាបន្ទាយរឹងមាំរបស់ក្រុមសកម្មប្រយុទ្ធហាម៉ាស ដែលបានបើកការវាយប្រហារដ៏គួរភ្ញាក់ផ្អើលកាលពីខែតុលា ឆ្នាំ២០២៣ ទៅលើអ៊ីស្រាអែល។

ចាប់តាំងពីពេលនោះមក យោធាបានដាក់ការឡោមព័ទ្ធទៅលើតំបន់ហ្កាហ្សាស្ទ្រីប ដែលធ្វើឲ្យកើតមហន្តរាយមនុស្សធម៌ ដោយបង្កជាការបំផ្លិចបំផ្លាញគ្រប់ទិសទីនៃតំបន់នេះ ការបម្លាស់ទីលំនៅដ៏ធំ ហើយនិងការខ្វះខាតស្បៀងអាហារ និងទឹកយ៉ាងធ្ងន់ធ្ងរ។

កងកម្លាំងអ៊ីស្រាអែលបានធ្វើប្រតិបត្តិការនៅជាយក្រុងហ្កាហ្សាអស់ជាច្រើនសប្តាហ៍ ដោយបានទៅកៀកបន្តិចនឹងភាគកណ្តាលទីក្រុង ជាទីដែលមានប្រជាជនប៉ាឡេស្ទីនប្រមាណ ១លាននាក់កំពុងស្នាក់នៅកាលពីខែមុន។

តាមរយៈការបង្ហោះនៅលើបណ្ដាញសង្គម X នាព្រឹកថ្ងៃអង្គារ (ទី១៦ ខែកញ្ញា) រដ្ឋមន្ត្រីការពារជាតិអ៊ីស្រាអែល លោក Israel Katz បានឲ្យដឹងថា៖ «ទីក្រុងហ្កាហ្សាកំពុងឆេះ។ IDF (កងកម្លាំងការពារជាតិរបស់អ៊ីស្រាអែល) វាយប្រហារដោយកណ្តាប់ដៃដែកទៅលើហេដ្ឋារចនាសម្ព័ន្ធភេរវករ ហើយទាហាន IDF កំពុងប្រយុទ្ធយ៉ាងក្លាហាន ដើម្បីបង្កើតលក្ខខណ្ឌ សម្រាប់ការដោះលែងចំណាប់ថ្នូ និងការកម្ចាត់ក្រុមហាម៉ាស»។

តែយ៉ាងណាក្ដី ភ្លាមៗ គេមិនទាន់ច្បាស់នោះទេថា តើលោក Katz កំពុងធ្វើអត្ថាធិប្បាយលើប្រតិបត្តិការផ្លូវគោក ដែលត្រូវបានរាយការណ៍ដែរ ឬយ៉ាងណា៕