មូលនិធិអភិវឌ្ឍន៏ជំនាញ (SDF) សហការជាមួយ សមាគមទេសចរណ៍កម្ពុជា (CATA) និង គណៈ​កម្មការ​គ្រប់​គ្រងគម្រោង ហូកា (Hoka) កំពុងបង្កើនជំនាញក្នុងវិស័យទេសចរណ៍ ដើម្បី​លើក​កម្ពស់​សមត្ថភាព ស្តង់ដា គុណភាព និងភាពប្រកួតប្រជែង នៅខេត្តកំពង់ធំ ក្នុងគោល​ដៅ​ទេសចរណ៍​ប្រកប​ដោយភាពទាក់ទាញមួយ សំដៅបង្កើត និងបង្កើន ការងារថ្មីៗ និងចូលរួមលើក​កម្ពស់​សេដ្ឋកិច្ចខេត្តកំពង់ធំ។

លោក គី សុខគីម នាយកប្រតិបត្តិមូលនិធិអភិវឌ្ឍន៏ជំនាញ (SDF) នៅថ្ងៃទី១៥ ខែកញ្ញា ឆ្នាំ​២០២៥​, បានចូលរួមកម្មវិធី បើកវគ្គបណ្តុះបណ្តាលបង្កើនជំនាញសំខាន់ៗចំនួន៤ ក្នុងវិស័យ​ទេស​ចរណ៍​រួម​មាន៖ ១) ជំនាញសេវាកម្មម្ហូបអាហារ និងភេសជ្ជៈ, ២) ជំនាញការិយាល័យ​ជួរ​មុខ​, ៣) ជំនាញចុងភៅ, និង ៤) ជំនាញគេហកិច្ច ដែលឆ្លុះបញ្ចាំង ភាពជាដៃគូរវាងរដ្ឋ និង​ឯកជន​ក្នុងការលើកកម្ពស់សមត្ថភាព និងភាពប្រកួតប្រជែងនៅក្នុងខេត្តកំពង់ធំ។ 

កម្មវិធី​បណ្តុះបណ្តាលនេះ រៀបចំឡើងក្នុងគោលបំណងពង្រឹង និងពង្រីកធនធានមនុស្សក្នុ ង​វិស័យ​ទេសចរណ៍ ដែលអាច ចូលរួមគាំទ្រការប្រែក្លាយខេត្តកំពង់ធំ ដែលជា​ខេត្ត​សម្បូរ​ដោយ​ធន​ធាន​សម្បត្តិ​វប្បធម៌, ប្រវត្តិសាស្ត្រ, និងធម្មជាតិ ទៅជាខេត្តគោល ដៅកម្សាន្តដ៏ពេញនិយម និង​អាច​បង្កើត និងបង្កើនការងារថ្មីៗបន្ថែមទៀត ដើម្បីបង្កើនប្រាក់ចំណូលជូនបងប្អូនប្រជាពលរដ្ឋ ព្រម​ទាំង ជួយបង្កើនតម្លៃបន្ថែម និងសក្ដានុពលទាក់ទាញភ្ញៀវទេសចរទាំងក្នុងស្រុក និង​បរទេស​។ កិច្ចសហការរបស់ភាគីពាក់ព័ន្ធសំខាន់ៗ បណ្តុះបណ្តាល​ជំនាញ​ក្នុង​វិស័​យ​ទេសចរណ៍​នា​ពេល​នេះ​ បានបង្ហាញយ៉ាងច្បាស់ អំពីគំរូនៃភាពជាដៃគូ រវាងវិស័យរដ្ឋនិងឯកជន ក្នុង ការ​អភិវឌ្ឍ​ជំនាញ​បំពេញ​តម្រូវការពិតប្រាកដក្នុងទីផ្សារការងារផងដែរ។

គូសបញ្ជាក់ថា គិតត្រឹមខែកញ្ញា ឆ្នាំ២០២៥, SDF បាននិងកំពុង​គាំទ្រ​ការ​អភិវឌ្ឍ​ជំនាញ​ក្នុង​វិស័យ​ទេសចរណ៍ ដោយបានអនុម័ត ថវិកាបដិភាគគាំទ្រដល់គម្រោងបណ្តុះបណ្តាលចំនួន ៥១ គម្រោង ដែលមានសិក្ខាកាមសរុបជិត៦ពាន់នាក់ (ស្ត្រី៤៥%) បានកំពុង ទទួល​បាន​ការ​បណ្តុះ​បណ្តាល​ជំនាញក្នុងវិស័យនេះ។ ដោយឡែកសម្រាប់កម្មវិធីបណ្តុះបណ្តាលស្ដីពីជំនាញ សេវាកម្ម ម្ហូប​អាហារ និងភេសជ្ជៈ ជំនាញការិយាល័យជួរមុខ ជំនាញចុងភៅ និង​ជំនាញ​គេហកិច្ច​នា​ព្រឹក​នេះ,​ SDF បានគាំទ្រដល់សិក្ខាកាមសរុបចំនួន ១២០ នាក់ ដែលក្នុងនោះស្រ្តីចំនួន ៥៥ នាក់ ស្មើ​នឹង ៤៦%។ វគ្គបណ្តុះបណ្តាលទាំងនេះ នឹងជួយសិក្ខាកាមទាំងអស់ឱ្យទទួល បានចំណេះដឹង និង​ជំនាញជាក់ស្តែង ដែលអាចបំពេញការងារប្រកបដោយប្រសិទ្ធភាព និងភាពច្នៃប្រឌិត។

បញ្ហា​នេះ SDF នឹងបន្តសហការជាមួយតួអង្គសំខាន់ៗ ក្នុងវិស័យទេសចរណ៍ ដើម្បី​បន្ត​ពង្រឹង និង​ពង្រីក​ទាំង​បរិមាណ និងគុណភាព ធនធានមនុស្ស ដែលអាចឆ្លើយ​តប​បាន​ទៅ​នឹង​តម្រូវ​ការ​ក្នុង​វិស័យ​នេះ ដើម្បីរួមចំណែកធ្វើឱ្យប្រសើរឡើងនូវផលិតផល និងសេវា កម្មទេសច​រណ៍ប្រ​កប​ដោយ​គុណ​ភាព និងភាពទាក់ទាញ ដែលអាចបង្កើត និងបង្កើនការងារកាន់តែច្រើន និងផ្តល់​ប្រាក់​ចំណូល​ដល់​ប្រជាពលរដ្ឋរបស់យើងកាន់តែខ្ពស់ ដែលនឹងជួយជំរុញ​កំណើន​សេដ្ឋកិច្ច​ជាតិ​យ៉ាង​សំខា​ន់​៕ អត្ថបទ៖ សុន រ៉ាឌី