សមយុទ្ធយោធា Arctic Light 2025 របស់សម្ព័ន្ធយោធាNATO ពេលនេះកំពុងដំណើរការនៅឆ្នេរដែនដី Greenland ដោយមានទាហានជាង៥៥០នាក់មកពីប្រទេសដាណឺម៉ាក បារាំង អាល្លឺម៉ង់ ស៊ុយអែត និងប្រទេសន័រវេស ចូលរួមក្នុងសមយុទ្ធរយៈពេល១០ថ្ងៃក្នុងគោលបំណងបង្កើនការត្រៀមខ្លួនប្រតិបត្តិការនៅក្នុងតំបន់អាកទិក។

 កងកម្លាំងប្រដាប់អាវុធរបស់ប្រទេសដាណឺម៉ាក រដ្ឋាភិបាលដែនដីGreenland និងទីបញ្ជាការរួមអាកទិកកំពុងសម្របសម្រួលសមយុទ្ធនេះ ដែលបង្ហាញពីនាវាចម្បាំងប្រទេសដាណឺម៉ាក HDMS Niels Juel យន្តហោះប្រយុទ្ធF-16 ឧទ្ធម្ភាគចក្រEH-101 និងកងកម្លាំងប្រតិបត្តិការពិសេស។

មេបញ្ជាការរួមតំបន់អាក់ទិក ឧត្តមសេនីយ Soren Andersen បាននិយាយកាលពីថ្ងៃចន្ទក្នុងអំឡុងពេលសមយុទ្ធថា «ការការពារជាតិរបស់ប្រទេសដាណឺម៉ាក មានភារកិច្ចការពារប្រទេសដាណឺម៉ាក ហើយវារួមមានទាំងដែនដី Greenland និងប្រជុំកោះFaroe ផងដែរ។ លោកនិយាយបន្ថែមថា «ដើម្បីការពារដែនដី Greenland យើងត្រូវហ្វឹកហាត់នៅដែនដី Greenland» ។

ប្រទេសបារាំង បានដាក់ពង្រាយនាវាគាំទ្រ FS Garonne រួមជាមួយយានដ្រូន និងកងទ័ពថ្មើរជើងតំបន់ភ្នំ ខណៈប្រទេសអាល្លឺម៉ង់កំពុងរួមចំណែកជាមួយក្រុមអ្នកសង្កេតការណ៍។

សកម្មភាពសំខាន់ៗក្នុងអំឡុងពេលសមយុទ្ធរួមមានការឡើងនាវា ការការពារហេដ្ឋារចនាសម្ព័ន្ធ ការដាក់ពង្រាយយានដ្រូន ប្រតិបត្តិការស្វែងរកនិងជួយសង្គ្រោះ ការការពារបរិស្ថានសមុទ្រ និងការឆ្លើយតបគ្រោះមហន្តរាយ។