មន្ត្រីជាន់ខ្ពស់សេតវិមានបាននិយាយថានឹងបង្ក្រាប«ចលនាភេរវកម្មក្នុងស្រុកដ៏ធំ» ដែលតាមការចោទប្រកាន់ថាចលនានេះបាននាំទៅដល់ការសម្លាប់សកម្មជនស្តាំនិយម លោក Charlie Kirk កាលពីសប្តាហ៍មុន។ ការអត្ថាធិប្បាយបែបនេះត្រូវបានលើកឡើងកាលពីថ្ងៃចន្ទនៅលើកម្មវិធី podcast របស់លោក Kirk ដែលត្រូវបានរៀបចំឡើងដោយអនុប្រធានាធិបតីសហរដ្ឋអាមេរិក លោក JD Vance ។

លោក Stephen Miller នាយរងសេនាធិការនៅសេតវិមានបាននិយាយថា «យើងនឹងបញ្ជូនកំហឹងទាំងអស់ដែលយើងមានទៅក្នុងយុទ្ធនាការត្រូវបានរៀបចំឡើង ដែលបានឈានដល់ការធ្វើឃាតលោក Kirk និងលុបបំបាត់បណ្តាញភេរវកម្មទាំងនេះ»។ ទោះបីជាក្រុមអ្នកស៊ើបអង្កេត មិនទាន់បានផ្តល់នូវហេតុផលសម្រាប់ការសម្លាប់លោកKirk ក៏ដោយ ក៏មនុស្សជាច្រើននៅខាងស្តាំនិយមបានស្តីបន្ទោសលើមនោគមវិជ្ជារបស់ក្រុមឆ្វេងនិយមភ្លាមៗចំពោះការធ្វើឃាតនេះ។

លោក Miller និងលោក Vance ទាំងពីរនាក់នេះបានចោទប្រកាន់ចលនាឆ្វេងនិយមជ្រុល ដោយបាននិយាយថា រដ្ឋបាលបច្ចុប្បន្ននឹងកំណត់គោលដៅ។ លោក Vance បានប្រើវោហាសាស្ត្រស្រដៀងគ្នានៅក្នុងសុន្ទរកថារបស់លោក។ នគរបាលបាននិយាយថា ពួកគេជឿថាអ្នកបាញ់ប្រហារសម្លាប់លោក Kirk គឺធ្វើសកម្មភាពតែម្នាក់ឯង។

អ្នកស្រុកនៅរដ្ឋ Utah អាយុ២២ ឆ្នាំម្នាក់ឈ្មោះ Tyler Robinson ត្រូវបានចាប់ខ្លួនកាលពីថ្ងៃសុក្រសប្តាហ៍មុនបន្ទាប់ពីការតាមចាប់ខ្លួនរយៈពេលពីរថ្ងៃ។ ជននេះត្រូវបានគេរំពឹងថានឹងត្រូវបានកាត់ទោសនៅថ្ងៃអង្គារនេះ។ អភិបាលរដ្ឋ Utah លោក Spencer Cox បានប្រាប់ប្រព័ន្ធផ្សព្វផ្សាយថា ជនសង្ស័យដែលមកពីគ្រួសារគណបក្សសាធារណៈរដ្ឋមានគំនិតឆ្វេងនិយម ប៉ុន្តែបានបដិសេធមិនផ្តល់ព័ត៌មានលម្អិតណាមួយឡើយ។