អ្នកការទូតជាន់ខ្ពស់អាមេរិក លោក Marco Rubio ដែលកំពុងធ្វើដំណើរទៅកាន់ទីក្រុង Doha ពីទីក្រុង Tel Aviv ប្រទេសអ៊ីស្រាអែល នៅថ្ងៃអង្គារ (ទី១៦ ខែកញ្ញា) បាននិយាយថា ប្រទេសកាតា និងសហរដ្ឋអាមេរិក កំពុងតែឈានទៅកៀកនឹងបញ្ចប់ការព្រមព្រៀងកិច្ចសហប្រតិបត្តិការការពារជាតិ ដោយការលើកឡើងនេះកើតឡើងបន្ទាប់ពីអ៊ីស្រាអែល បានវាយប្រហារលើអ្នកដឹកនាំនយោបាយក្រុមហាម៉ាស នៅប្រទេសកាតា កាលពីសប្ដាហ៍មុន ជាហេតុការណ៍ដែលបាននាំឲ្យមានការថ្កោលទោសយ៉ាងទូលំទូលាយ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា លោកមិនបានច្រានចោលការវាយប្រហារបន្ថែមទៀតលើមេដឹកនាំក្រុមហាម៉ាស «នៅគ្រប់ទីកន្លែងដែលពួកគេរស់នៅនោះឡើយ» ខណៈដែលមេដឹកនាំនៃបណ្ដាប្រទេសអារ៉ាប់ និងរដ្ឋអ៊ីស្លាម បានរៀបចំកិច្ចប្រជុំកំពូលមួយ ដើម្បីគាំទ្រប្រទេសកាតា បន្ទាប់ពីមានការវាយប្រហាររបស់អ៊ីស្រាអែលកាលពីសប្តាហ៍មុន នៅក្នុងរដ្ឋឈូងសមុទ្រ។

លោក Rubio បានអំពាវនាវឲ្យកាតាបន្តតួនាទីរបស់ខ្លួន ជាអ្នកសម្រុះសម្រួល រវាងអ៊ីស្រាអែល និងក្រុមហាម៉ាស ដើម្បីបានឈានដល់បទឈប់បាញ់ ក្នុងសង្គ្រាម នៅតំបន់ហ្កាហ្សា ដោយនិយាយថា មាន «ពេលវេលាខ្លីណាស់ដែលកិច្ចព្រមព្រៀងអាចកើតឡើងបាន»។

ក្នុងពេលដែលកំពុងចាកចេញពីទីក្រុង Tel Aviv ទៅកាន់ទីក្រុង Doha លោក Rubio បាននិយាយថា៖ «ប្រសិនបើប្រទេសណាមួយក្នុងពិភពលោក អាចជួយសម្របសម្រួលដំណើរការនេះបាន ប្រទេសនោះ គឺកាតា»៕