រដ្ឋមន្ត្រីការបរទេសអាមេរិក លោក Marco Rubio នៅថ្ងៃអង្គារ (ទី១៦ ខែកញ្ញា) នេះ បានព្រមានថា ក្រុមហាម៉ាសមានពេលតែប៉ុន្មានថ្ងៃប៉ុណ្ណោះ ក្នុងការទទួលយកកិច្ចព្រមព្រៀងបទឈប់បាញ់ ខណៈដែលអ៊ីស្រាអែលបានទម្លាក់គ្រាប់បែកលើទីក្រុងហ្កាហ្សា

ខណៈដែលលោកបានចេញដំណើរពីអ៊ីស្រាអែលតម្រង់ទៅប្រទេសសម្រុះសម្រួល គឺកាតា លោក Rubio បានប្រាប់អ្នកសារព័ត៌មានថា៖ «អ៊ីស្រាអែលបានចាប់ផ្តើមប្រតិបត្តិការនៅទីនោះ។ ដូច្នេះយើងគិតថា យើងមានពេលវេលាខ្លីណាស់ដែលកិច្ចព្រមព្រៀងអាចកើតឡើង។ យើងមិនមានរយៈពេលប៉ុន្មានខែទៀតទេ ហើយយើងប្រហែលជាមានតែប៉ុន្មានថ្ងៃ និងប្រហែលជានៅសល់ពេល ២-៣សប្តាហ៍ទៀតប៉ុណ្ណោះ»។

លោក Rubio បានឲ្យដឹងទៀតថា៖ «ជម្រើសទី១ របស់យើង គឺថា ជម្លោះនេះ បញ្ចប់តាមរយៈដំណោះស្រាយ ដែលក្រុមហាម៉ាស និយាយថា យើងនឹងគ្មានយោធា យើងនឹងលែងបង្កការគំរាមកំហែងទៀត»។

លោក Rubio បានបន្ថែមថា៖ «ពេលខ្លះនៅពេលដែលអ្នកកំពុងដោះស្រាយជាមួយក្រុមប្រព្រឹត្តអំពើឃោរឃៅគ្មានមេត្តា ដូចជាក្រុមហាម៉ាសនេះ វាមិនអាចទៅរួចទេ ប៉ុន្តែយើងសង្ឃឹមថា វាអាចកើតឡើង»។

គួរបញ្ជាក់ថា លោក Rubio បានជួបជាមួយ Benjamin Netanyahu ក្នុងទីក្រុង Jerusalem កាលពីថ្ងៃចន្ទ ដោយផ្តល់ការគាំទ្រដល់ការវាយលុកថ្មីរបស់នាយករដ្ឋមន្ត្រីអ៊ីស្រាអែលនៅទីក្រុងហ្កាហ្សា និងគោលដៅដែលត្រូវបានអះអាងរបស់ខ្លួន ក្នុងការលុបបំបាត់ក្រុមហាម៉ាស៕