ក្រុមគ្រួសារនៃចំណាប់ថ្នូរដែលកំពុងត្រូវបានឃុំខ្លួន នៅតំបន់ហ្កាហ្សា បានប្រមូលផ្តុំគ្នាតក់ក្រហល់ ដើម្បីរៀបចំការតវ៉ានៅខាងក្រៅគេហដ្ឋានរបស់នាយករដ្ឋមន្ត្រី លោក Benjamin Netanyahu ពេញមួយយប់ ពីថ្ងៃចន្ទ (ទី១៥ ខែកញ្ញា) ដល់ថ្ងៃអង្គារ (ទី១៦ ខែកញ្ញា) ចំពេលមានរបាយការណ៍ថា IDF (កងកម្លាំងការពារជាតិអ៊ីស្រាអែល) បានចាប់ផ្តើមប្រតិបត្តិការផ្លូវគោក ក្នុងគោលបំណងអនុវត្តការដណ្ដើមកាន់កាប់ដែលបានសន្យាជាយូរមកហើយ លើទីក្រុងហ្កាហ្សា ជាអ្វីដែលពួកគេបារម្ភថា នឹងមានគ្រោះថ្នាក់ដល់មនុស្សជាទីស្រឡាញ់របស់ខ្លួន។

គេហទំព័រប្រព័ន្ធផ្សព្វផ្សាយប៉ាឡេស្ទីនជាច្រើន បានរាយការណ៍ថា រថក្រោះអ៊ីស្រាអែលបានរំកិលចូលទៅក្នុងទីក្រុងហ្កាហ្សាភាគខាងជើង ជាទីដែលប្រជាជនប៉ាឡេស្ទីនរាប់សែននាក់ កំពុងជ្រកកោន ប៉ុន្តែសេចក្ដីរាយការណ៍ទាំងនោះមិនត្រូវបានអះអាងថា ពិតនោះទេ ហើយ IDF ក៏មិនបានចេញសេចក្តីថ្លែងការណ៍បញ្ជាក់នោះដែរ។

បើទោះបីជាការចាប់ផ្តើមប្រតិបត្តិការផ្លូវគោក ហាក់បីដូចជាមិនមានការសន្និដ្ឋានឲ្យបានច្បាស់លាស់ក៏ដោយ ក៏ IDF ប្រាកដណាស់បង្កើនប្រតិបត្តិការរបស់ខ្លួន នៅជុំវិញទីក្រុងហ្កាហ្សា។ ប្រព័ន្ធផ្សព្វផ្សាយប៉ាឡេស្ទីន បានរាយការណ៍ថា IDF កំពុងវាយលុកទីក្រុងហ្កាហ្សា ដោយប្រើប្រាស់យន្តហោះចម្បាំង កាំភ្លើងធំ និងយានដ្រូន ដែលបណ្តាលឲ្យមានការផ្ទុះដ៏ធំដែលអាចឮពីចម្ងាយ។ សូម្បីតែអ្នកស្រុក នៅភាគកណ្តាលអ៊ីស្រាអែល ក៏រាយការណ៍ថា មានអារម្មណ៍ញ័រដោយសារការវាយប្រហារ។ 

ក្នុងរយៈពេលប៉ុន្មានថ្ងៃថ្មីៗនេះ យោធាអ៊ីស្រាអែលបានធ្វើការវាយប្រហាររាប់រយដង នៅក្នុងទីក្រុងហ្កាហ្សា ក្នុងនោះរួមទាំងទៅលើអគារខ្ពស់ៗ មុនពេលមានការវាយលុកដ៏ខ្លាំងក្លាប្រឆាំងនឹងក្រុមហាម៉ាស នៅក្នុងតំបន់។ មន្ត្រីអ៊ីស្រាអែលបាននិយាយថា ប្រជាជនប៉ាឡេស្ទីន ៣០០.០០០នាក់ បានធ្វើតាមការអំពាវនាវរបស់ IDF ដែលតម្រូវឲ្យជនស៊ីវិលជម្លៀសចេញពីទីក្រុងហ្កាហ្សា ក្នុងរយៈពេលប៉ុន្មានសប្តាហ៍ថ្មីៗនេះ បន្ទាប់ពីចំនួនប្រជាជនភៀសខ្លួនបានកើនឡើងដល់ប្រហែល ១លាននាក់កាលពីដើមឆ្នាំនេះ។

ចំពេលមានសេចក្តីរាយការណ៍ថា IDF កំពុងចាប់ផ្តើមដំណាក់កាលដំបូងនៃការវាយប្រហាររបស់ខ្លួនលើទីក្រុងហ្កាហ្សា សមាគមគ្រួសារចំណាប់ថ្នូរ (Hostages Families Forum) បានចេញការអង្វរយ៉ាងអស់សង្ឃឹម កាលពីយប់ថ្ងៃចន្ទ ដើម្បីការពារមនុស្សជាទីស្រលាញ់របស់ពួកគេ ដោយចោទប្រកាន់លោក Netanyahu ថា បង្កហានិភ័យដល់ពួកគេ៕