នៅថ្ងៃអង្គារនេះ ក្រុមស៊ើបអង្កេតអង្គការសហប្រជាជាតិ(UN) បានចោទប្រកាន់អ៊ីស្រាអែលថា កំពុងប្រព្រឹត្តអំពើប្រល័យពូជសាសន៍នៅតំបន់ហ្កាហ្សា ដើម្បីបំផ្លាញជនប៉ាឡេស្ទីននៅទីនោះឲ្យអស់ ហើយនិងបានដាក់ការស្តីបន្ទោសនាយករដ្ឋមន្រ្តីអ៊ីស្រាអែល និងក្រុមមន្រ្តីជាន់ខ្ពស់ផ្សេងទៀតរបស់អ៊ីស្រាអែល សម្រាប់ការញុះញង់ ។

គណៈកម្មការស៊ើបអង្កេតឯករាជ្យអន្តរជាតិ(COI)របស់ UN ដែលពុំបាននិយាយតំណាងឲ្យអង្គការពិភពលោកមួយនេះ បានរកឃើញថា ការប្រល័យពូជសាសន៍ កំពុងកើតឡើងនៅតំបន់ហ្កាហ្សា ហើយអំពើប្រល័យពូជសាសន៍នេះ នៅតែបន្តកើតឡើងដដែល ។ លោក Navi Pillay គឺជាប្រធាន COI និយាយថា ទំនួលខុសត្រូវស្ថិតនៅលើរដ្ឋអ៊ីស្រាអែល ។

ភ្លាមៗនោះដែរ អ៊ីស្រាអែលបានច្រានចោលរបាយការណ៍នេះ ក្នុងនោះក្រសួងការបរទេសពួកគេ បានចាត់ទុកថាជារឿងមួលបង្កាច់ និងមិនមែនជាការពិត ហើយនិងអំពាវនាវឲ្យមានការលុបបំបាត់ជាបន្ទាន់គណៈកម្មការស៊ើបអង្កេតមួយនេះ ។

គណៈកម្មការ COI ដែលមានភារកិច្ចស៊ើបអង្កេតស្ថានភាពសិទ្ធិមនុស្សនៅដែនដីកាន់កាប់ប៉ាឡេស្ទីន បានចុះផ្សាយរបាយការណ៍ចុងក្រោយរបស់ខ្លួន រយៈពេលជិត ២ឆ្នាំ ក្រោយសង្រ្គាមផ្ទុះឡើងនៅតំបន់ហ្កាហ្សា បន្ទាប់ពីការវាយប្រហាររបស់ក្រុមហាម៉ាសលើតំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាំ ២០២៣ ។

តួលេខពីក្រសួងសុខាភិបាលហ្កាហ្សាគ្រប់គ្រងដោយក្រុមហាម៉ាស បានឲ្យដឹងថា មនុស្សជិត ៦៥.០០០នាក់ ត្រូវបានសម្លាប់នៅតំបន់ហ្កាហ្សា ចាប់តាំងពីសង្រ្គាមចាប់ផ្តើម ៕