ប្រធានាធិបតីសហរដ្ឋអាមេរិកលោក Donald Trump បញ្ជាក់ម្តងហើយម្តងទៀតពីការពោលអះអាងរបស់លោកថា អ៊ីស្រាអែលនឹងមិនវាយប្រហារប្រទេសកាតាម្តងទៀតនោះទេ ។

កាលពីសប្តាហ៍មុន អ៊ីស្រាអែល បានទម្លាក់គ្រាប់បែកលើការិយាល័យនយោបាយរបស់ក្រុមជីវពលប៉ាឡេស្ទីនហាម៉ាសនៅទីក្រុងដូហា គឺជាចំណាត់ការមួយធ្វើឲ្យមានការថ្កោលទោសយ៉ាងខ្លាំងនៅទូទាំងអឺរ៉ុប និងពិភពអារ៉ាប់ ហើយនិងធ្វើឲ្យប្រធានាធិបតីសហរដ្ឋអាមេរិកមួម៉ៅយ៉ាងខ្លាំង ដោយលោកនិយាយថា លោកពុំត្រូវបានជូនដំណឹងប្រាប់ជាមុននោះទេ ចំពោះការវាយប្រហារនេះ ។

លោក Trumpនិយាយថា អ៊ីស្រាអែលនឹងមិនវាយប្រហារកាតាម្តងទៀតនោះទេ ដូចលោកនិយាយអញ្ចឹង លោកហៅកាតា អ្នកហៅកាតា លោកគិតថា វាគឺជាពាក្យពិរោះ ហើយច្បាស់ណាស់ថា ពួកគេគឺជាសម្ព័ន្ធមិត្តដ៏ល្អបំផុតរបស់ពួកយើង ហើយមានមនុស្សច្រើនណាស់ ពុំបានដឹងរឿងនេះ ។

លោកបន្តទៀតថា លោកទើបអានកាសែតរយៈពេល ១ម៉ោងមុន ពេលដែលក្រុមហាម៉ាសនិយាយថា ពួកគេនឹងប្រើប្រាស់ចំណាប់ថ្នូរ ២០នាក់ជាខែលមនុស្ស ។ ក្រុមហាម៉ាសនឹងនាំពួកគេចេញពីផ្លូវរូងក្រោមដីដ៏ងងឹត ហើយប្រើប្រាស់ពួកគេនៅខ្សែត្រៀមដែលអ៊ីស្រាអែលប្រុងវាយប្រហារ ហើយពួកគេនឹងត្រូវស្លាប់ ។ លោកគិតថា វាគឺជារឿងអាក្រក់ខ្លាំងណាស់ ហើយលោកបានពន្លត់សេចក្តីថ្លែងការណ៍នេះ ដូចអ្នកបានឃើញស្រាប់ហើយ ។ 

 គួរឲ្យដឹថា លោក Trump បានព្រមានក្រុមហាម៉ាស ប្រឆាំងនឹងការផ្លាស់ប្តូរទីតាំងចំណាប់ខ្មាំងជនជាតិអ៊ីស្រាអែលនៅតំបន់ហ្កាហ្សា ដើម្បីរារាំងយុទ្ធនាការយោធាអ៊ីស្រាអែល ហើយលោកអំពាវនាវឲ្យដោះលែងពួកគេ ។ 

លោក Trump បានសរសេរនៅក្នុងសារបង្ហោះលើបណ្តាញព័ត៌មានសង្គមកាលពីថ្ងៃចន្ទថា លោកបានអានរបាយការណ៍ព័ត៌មានដែលបង្ហាញថាក្រុមហាម៉ាសនឹងប្រើប្រាស់ឈ្លើយសឹកជា ខែលការពារមនុស្ស ក្នុងពេលមានការទម្លាក់គ្រាប់បែកឥតឈប់ឈររបស់អ៊ីស្រាអែលនៅតំបន់ហ្កាហ្សា ៕