នាយករដ្ឋមន្ត្រីថៃ លោក Anutin Charnvirakul ជិតបង្កើតបានរដ្ឋាភិបាលថ្មីហើយ ពោលគឺបន្ទាប់ពីប្រទេសនេះមាននូវវិបត្តិនយោបាយមួយរយៈពេល ដែលឃើញក្រុមចម្រុះសំឡេងភាគតិច នៅខាងក្រៅឥទ្ធិពលរបស់គ្រួសារអ្នកនយោបាយត្រកូលស៊ីណាវ៉ាត់ (Shinawatra)។

ក្នុងសុន្ទរកថាខ្លីៗ នៅពេលរូបលោកចាកចេញពីវិមានរដ្ឋាភិបាល លោក Anutin បានប្រាប់អ្នកសារព័ត៌មានថា ដំណើរការជ្រើសរើសគណៈរដ្ឋមន្ត្រីដំបូងរបស់លោក ត្រូវបានបញ្ចប់ហើយ ហើយនឹងត្រូវដាក់ថ្វាយសុំរាជានុញ្ញាតពីព្រះមហាក្សត្រ នៅយប់ថ្ងៃអង្គារ (ទី១៦ ខែកញ្ញា) នេះ។ នៅមុននេះ លោកបានបង្ហាញពីតំណែងគណៈរដ្ឋមន្ត្រីសំខាន់ៗ ក្នុងនោះមានរួមទាំងមន្ត្រីការិយាល័យជាន់ខ្ពស់ លោក Ekniti Nitithanprapas កាន់តួនាទីជារដ្ឋមន្ត្រីហិរញ្ញវត្ថុផងដែរ។

ចំណាត់ការនេះ នឹងកើតមានឡើងជិត ២សប្តាហ៍បន្ទាប់ពីលោក Anutin ត្រូវបានសភាបោះឆ្នោតជ្រើសរើសឲ្យធ្វើជានាយករដ្ឋមន្ត្រីថ្មីទី៣ របស់ប្រទេស ក្នុងរយៈពេល ២ឆ្នាំ ដោយបានបញ្ចប់រយៈពេលនៃការមានបញ្ហាអស្ថិរភាពនយោបាយ។

លោក Anutin បានសន្យាថា លោកនឹងដឹកនាំរដ្ឋាភិបាលសំឡេងភាគតិចបណ្តោះអាសន្នរយៈពេលត្រឹមតែ ៤ខែប៉ុណ្ណោះ មុនពេលប្រកាសពីការបោះឆ្នោតថ្មី ក្រោមកិច្ចព្រមព្រៀងជាមួយក្រុមកំណែទម្រង់ គឺគណបក្សប្រជាជន (People’s Party) ដែលបានផ្ដល់ការគាំទ្រដល់កិច្ចប្រែងប្រែងរបស់លោក ដើម្បីបានក្លាយនាយករដ្ឋមន្ត្រី ដោយការមិនចូលរួមក្នុងក្រុមចម្រុះ។

 គួរបញ្ជាក់ថា មេដឹកនាំក្រុមអភិរក្សនិយម គឺគណបក្ស Bhumjaithai លោក Anutin បានឡើងស្នងតំណែងលោកស្រី Paetongtarn Shinawatra ដែលត្រូវបានតុលាការធម្មនុញ្ញបណ្តេញចេញពីតំណែង ពាក់ព័ន្ធនឹងការបំពានក្រមសីលធម៌ កាលពីខែសីហា។

ក្រុមរបស់លោក Anutin ឥឡូវនេះ មានគណបក្សគាំទ្រយោធា និងអភិរក្សនិយម ដែលពីមុនបានគាំទ្រលោកស្រី Paetongtarn ខណៈដែលគណបក្ស Pheu Thai របស់លោកស្រី ត្រូវបានរុញទៅជាគណបក្សប្រឆាំង។ នៅពេលដែលពួកគេទទួលបានរាជានុញ្ញាតពីព្រះមហាក្សត្រ សមាជិកនៃគណៈរដ្ឋមន្ត្រីថ្មី នឹងត្រូវស្បថចូលកាន់តំណែងក្រោមព្រះរាជធិបតីរបស់ព្រះមហាក្សត្រ Maha Vajiralongkorn មុនពេលចូលបំពេញតួនាទីជាផ្លូវការ៕