អ្នកនាំពាក្យទីភ្នាក់ងារមនុស្សធម៌អង្គការសហប្រជាជាតិ(UNOCHA) និយាយថា ក្បួនរថយន្តដឹកជំនួយមនុស្សធម៌ជាច្រើនទៅកាន់ទីក្រុងហ្កាហ្សា ត្រូវបានរារាំងមិនអនុញ្ញាតឲ្យចូលដោយអាជ្ញាធរអ៊ីស្រាអែល ។

អ្នកស្រី Olga Cherevko គឺជាអ្នកនាំពាក្យរបស់ UNOCHA និយាយនៅក្នុងសារបង្ហោះលើបណ្តាញព័ត៌មានសង្គម Xថា នៅព្រឹកនេះ ពួកយើងព្យាយាមធ្វើដំណើរទៅកាន់ទីក្រុងហ្កាហ្សា ដើម្បីចែកចាយគ្រឿងផ្គត់ផ្គង់មនុស្សធម៌មួយចំនួន ហើយបេសកកម្មមួយនេះ កាលពីដំបូងឡើយ ត្រូវបានគេយល់ព្រម ប៉ុន្តែនៅពេលដែលពួកយើងធ្វើដំណើរដល់ស្ពាន Wadi Gaza ពួកយើងត្រូវបានអាជ្ញាធរអ៊ីស្រាអែលជូនដំណឹងមកវិញថា បេសកកម្មរបស់ពួកយើង ត្រូវបានច្រានចោលហើយ ។

អ្នកស្រី Cherevko បានបញ្ជាក់ឡើងវិញពីសារៈសំខាន់សម្រាប់ជំនួយចូលទៅកាន់តំបន់ភាគខាងជើងហ្កាហ្សា និងធានាមនុស្សដែលពុំអាចបំលាស់ទីបាន ឬមនុស្សដែលមិនចង់បំលាស់ទី ត្រូវបានការពារ ហើយតម្រូវការមូលដ្ឋានរបស់ពួកគេ ត្រូវបានឈានដល់ ។

ចាប់តាំងពីការបើកការវាយប្រហារជើងគោកកាលពីថ្ងៃចន្ទម្សិលមិញ ដើម្បីដណ្តើមគ្រប់គ្រងទីក្រុងហ្កាហ្សា យោធាអ៊ីស្រាអែល បានបន្តព្យាយាមឡោមទ័ព្ធតំបន់ហ្កាហ្សាស្រ្ទីប បង្កើតឲ្យមានគ្រោះថ្នាក់មនុស្សធម៌ ជាមួយនឹងការបំផ្លិចបំផ្លាញសកល ការជម្លៀសខ្លួនមនុស្សទ្រង់ទ្រាយធំ និងកង្វះខាតស្បៀងអាហារ និងទឹកស្អាតធ្ងន់ធ្ងរ ៕