នគរបាលទីម័រខាងកើត ឬទីម័រលេស្ត (Timor-Leste) នៅថ្ងៃអង្គារ (ទី១៦ ខែកញ្ញា) នេះ បានបាញ់ឧស្ម័នបង្ហូរទឹកភ្នែកទៅលើក្រុមបាតុករដែលតវ៉ាជាថ្ងៃទី២ ប្រឆាំងនឹងផែនការទិញរថយន្តផ្លូវការថ្មី សម្រាប់សមាជិកសភា ដែលបានក្លាយជាវិបត្តិចុងក្រោយបំផុត ក្នុងប្រទេសក្រីក្របំផុតមួយ នៅតំបន់អាស៊ីអាគ្នេយ៍។

យោងតាមអ្នកសារព័ត៌មានបានឲ្យដឹងថា មនុស្សជាង ២.០០០នាក់ ដែលភាគច្រើនជានិស្សិតមកពីសាកលវិទ្យាល័យជាច្រើន ក្នុងរដ្ឋធានី Dili បានប្រមូលផ្តុំគ្នានៅជិតសភាជាតិ ដើម្បីតវ៉ាប្រឆាំងនឹងផែនការទិញរថយន្ត សម្រាប់សមាជិកសភាម្នាក់ ១គ្រឿងៗ ក្នុងចំណោម ៦៥នាក់។

បាតុកម្មដែលបានចាប់ផ្តើមដោយសន្តិវិធី បានប្រែក្លាយជាហិង្សា នៅពេលនគរបាលបានបាញ់ឧស្ម័នបង្ហូរទឹកភ្នែក បន្ទាប់ពីបាតុករមួយចំនួនបានគប់ដុំថ្មទៅកាន់ពួកគេ។ វាបានកើតឡើងបន្ទាប់ពីមានការតវ៉ាស្រដៀងគ្នានេះ កាលថ្ងៃទី១៥ ខែកញ្ញា ដែលបានជំរុញឲ្យគណបក្សនយោបាយមួយចំនួន ប្រកាសថា ពួកគេនឹងស្នើឲ្យសភាលុបចោលការទិញនេះ។

គណបក្សទាំងនោះ នៅមុននោះបានអនុម័តថវិកាឆ្នាំ២០២៥ ដែលរួមបញ្ចូលនូវមូលនិធិ សម្រាប់ការទិញរថយន្ត។ ក្រុមអ្នកតវ៉ាបានប្តេជ្ញាបន្តការប្រមូលផ្តុំរបស់ពួកគេ រហូតដល់ផែនការនេះ ត្រូវបានលុបចោលជាផ្លូវការ។

គិតត្រឹមថ្ងៃទី១៦ ខែកញ្ញានេះ រដ្ឋាភិបាលទីម័រខាងកើត មិនទាន់ចេញការឆ្លើយតបជាផ្លូវការ ទាក់ទងនឹងការតវ៉ានេះនៅឡើយទេ៕