អ៊ីស្រាអែលបាននិយាយថា ខ្លួនបានបើកការវាយលុកថ្មើរជើងបន្ថែមទៀតលើទីក្រុងហ្កាហ្សាកាលពីថ្ងៃអង្គារសប្ដាហ៍នេះ ផ្គើននឹងការថ្កោលទោសជាអន្តរជាតិ ខណៈពលរដ្ឋប៉ាឡេស្ទីនបានភៀសខ្លួនចេញពីតំបន់ទីក្រុងដ៏ធំបំផុតនៃដែនដីរងការឡោមព័ទ្ធនេះ ដោយរលកនៃការទម្លាក់គ្រាប់បែកកាន់តែខ្លាំង។

មន្ត្រីអ៊ីស្រាអែលបាននិយាយថា ការលុកលុយដែលរំពឹងទុកជាយូរមកហើយបានចាប់ផ្តើមនៅជាយក្រុងនេះ ជាទីដែលយោធាអ៊ីស្រាអែល បានបង្កើនល្បឿននៃការវាយប្រហារតាមអាកាស និងការបំផ្លិចបំផ្លាញប៉មខ្ពស់ៗ កាលពីសប្តាហ៍មុន។

រដ្ឋមន្ត្រីការពារជាតិអ៊ីស្រាអែល លោក Katz បានសរសេរកាលពីថ្ងៃអង្គារថា ដែនដីហ្កាហ្សា កំពុងឆាបឆេះ ។កងកម្លាំងការពារអ៊ីស្រាអែល (IDF) កំពុងវាយលុកហេដ្ឋារចនាសម្ព័ន្ធភេរវកម្ម និងធ្វើការដើម្បីធានាការដោះលែងចំណាប់ខ្មាំង និងការកម្ចាត់ក្រុមហាម៉ាស។នាយករដ្ឋមន្ត្រី Benjamin Netanyahu បាននិយាយថា អ៊ីស្រាអែលកំពុងស្ថិតក្នុងដំណាក់កាលសំខាន់នៅក្នុងសង្គ្រាម ខណៈកំពុងវាយប្រហារទីក្រុង ហ្កាហ្សា ដែលរដ្ឋាភិបាលរបស់លោកមើលឃើញថាជាបន្ទាយដ៏រឹងមាំចុងក្រោយមួយរបស់ក្រុមហាម៉ាស។

ការឈ្លានពាននេះកើតឡើងខណៈអង្គការសហប្រជាជាតិ និងប្រទេសផ្សេងទៀតបានព្រមានថា ការវាយប្រហារនឹងកាន់តែធ្ងន់ធ្ងរខ្លាំងដល់វិបត្តិមនុស្សធម៌យ៉ាប់យ៉ឺនខ្លាំងរួចទៅហើយ ដោយផ្នែកខ្លះនៃតំបន់ហ្កាហ្សាត្រូវបានប្រកាសជាផ្លូវការថាស្ថិតនៅក្រោមទុរ្ភិក្ស។ ប្រជាជនប្រហែលមួយលាននាក់ ជិតពាក់កណ្តាលនៃចំនួនប្រជាជននៃដែនដីនេះ រស់នៅក្នុង និងជុំវិញទីក្រុងហ្កាហ្សា។ អ៊ីស្រាអែលបានព្យាយាមបង្ខំប្រជាជនក្នុងតំបន់ឱ្យជម្លៀសចេញ ប៉ុន្តែ IDF បាននិយាយថា រហូតមកដល់ពេលនេះមានមនុស្សប្រហែល ៤០% ប៉ុណ្ណោះដែលបានចាកចេញ ជាចំនួនដែលទូរទស្សន៍ CNN មិនអាចបញ្ជាក់ដោយឯករាជ្យ៕