ប្រធានាធិបតីអេក្វាឌ័រ លោក Daniel Noboa កាលពីថ្ងៃអង្គារ (១៦ កញ្ញា) បានប្រកាសដាក់គ្រាអាសន្ននៅក្នុងខេត្តចំនួន៧ នៃប្រទេសអាមេរិកខាងត្បូងដែលរងគ្រោះដោយអំពើហិង្សាមួយនេះ ជុំវិញការតវ៉ាយ៉ាងតានតឹងប្រឆាំងនឹងការលុបចោលឧបត្ថម្ភធនប្រេង។

លោក Noboa បានប្រកាសកាត់ឧបត្ថម្ភធននេះកាលពីសប្តាហ៍មុន ក្នុងកិច្ចប្រឹងប្រែងដើម្បីសន្សំប្រាក់ ១,១ពាន់លានដុល្លារ ដែលលោកនិយាយថានឹងត្រូវបញ្ជូនបន្តទៅខាងជំនួយសង្គម និងកម្មវិធីជំនួយកសិកម្ម។ ប៉ុន្តែជំហាននេះបានធ្វើឱ្យតម្លៃប្រេងម៉ាស៊ូត ហក់ឡើងយ៉ាងគំហុកពី ១,៨០ដុល្លារ ទៅដល់ ២,៨០ដុល្លារ ក្នុងមួយហ្គាឡុង ដែលធ្វើឱ្យប្រជាជនខឹងសម្បារ។

បាតុកម្មបានផ្ទុះឡើងកាលពីថ្ងៃអង្គារដដែលនោះ ដោយនគរបាលអេក្វាឌ័របានប្រើប្រាស់ឧស្ម័នបង្ហូរទឹកភ្នែក និងយុទ្ធសាស្ត្រគ្រប់គ្រងកុបកម្ម ដើម្បីបំបែកហ្វូងអ្នកតវ៉ាក្នុងទីក្រុងគីតូ ខណៈបាតុករប្រមូលផ្ដុំគ្នាប្រឆាំងនឹងការលុបចោលការឧបត្ថម្ភធនប្រេងម៉ាស៊ូតរបស់រដ្ឋាភិបាល។

ការប្រឈមមុខដាក់គ្នាយ៉ាងហិង្សាបានផ្ទុះឡើង នៅពេលក្រុមបាតុករបានគប់វត្ថុដាក់នគរបាល ហើយមន្រ្តីសមត្ថកិច្ចក៏បានឆ្លើយតបវិញដោយការបាញ់ឧស្ម័នបង្ហៀរទឹកភ្នែក និងរុញច្រានហ្វូងមនុស្ស។ នៅជាយក្រុងគីតូ ក្រុមបាតុករបានបិទផ្លូវហាយវេដោយប្រើដុំថ្ម ពំនូកដី និងដាក់របាំងធំៗ។ កម្លាំងនគរបាល និងយោធាបានចុះប្រតិបត្តិការដើម្បីបោសសម្អាតរបាំងផ្លូវទាំងនោះ ដោយប្រើគ្រឿងចក្រឈូសឆាយកម្ទេចកម្ទីចេញពីផ្លូវដើម្បីសម្រួលចរាចរណ៍ឡើងវិញ៕