លោកប្រធានាធិបតី Donald Trump បាននិយាយកាលពីថ្ងៃអង្គារ ១៦ កញ្ញា ថា សហរដ្ឋអាមេរិក និងចិនមានកិច្ចព្រមព្រៀងមួយដែលនឹងរក្សាកម្មវិធីវីដេអូកម្សាន្តខ្លីៗ TikTok ដែលកំពុងដំណើរការនៅសហរដ្ឋអាមេរិក ដោយផ្ទេរទ្រព្យសម្បត្តិរបស់សហរដ្ឋអាមេរិកទៅឱ្យម្ចាស់ជាជនជាតិអាមេរិកពីក្រុមហ៊ុនមេ ByteDance របស់ប្រទេសចិន ដែលអាចដោះស្រាយបញ្ហាអូសបន្លាយជិតមួយឆ្នាំមកនេះ។

កិច្ចព្រមព្រៀងមួយលើកម្មវិធីប្រព័ន្ធផ្សព្វផ្សាយសង្គមដ៏ពេញនិយមដែលមានអ្នកប្រើប្រាស់ចំនួន ១៧០ លាននាក់នៅសហរដ្ឋអាមេរិក តំណាងរបកគំហើញមួយក្នុងកិច្ចពិភាក្សារយៈពេលជាច្រើនខែរវាងប្រទេសមហាអំណាចសេដ្ឋកិច្ចធំបំផុតលេខ ១ និងលេខ ២ របស់ពិភពលោក ដែលបានព្យាយាមលុបបំបាត់សង្គ្រាមពាណិជ្ជកម្មដ៏តានតឹង ។

លោក Trump បាននិយាយនៅក្នុងសន្និសីទសារព័ត៌មាននៅសេតវិមាន ដោយពុំបានផ្តល់ព័ត៌មានលម្អិតបន្ថែមថា យើងមានកិច្ចព្រមព្រៀងមួយលើបណ្ដាញសង្គម TikTok ។យើងមានក្រុមក្រុមហ៊ុនធំៗជាច្រើនដែលចង់ទិញ ។ ការប្រកាសនេះបានកើតឡើងមួយថ្ងៃមុនពេលកំណត់ថ្ងៃទី ១៧ ខែកញ្ញា ដើម្បីលក់ ឬបិទកម្មវិធីនេះ។ ក្រោយមកទៀតនៅថ្ងៃដដែលនោះ សេតវិមានបានបន្ថែមរយៈពេលកំណត់នោះរហូតដល់ថ្ងៃទី ១៦ ខែធ្នូ ដោយផ្តល់ឱ្យក្រុមហ៊ុនមេ ByteDance ៩០ ថ្ងៃទៀតដើម្បីសម្រេចបានកិច្ចព្រមព្រៀងមួយ។ 

កិច្ចព្រមព្រៀងណាមួយអាចទាមទារការយល់ព្រមពីសភាគ្រប់គ្រងដោយគណបក្សសាធារណរដ្ឋដែលបានអនុម័តច្បាប់នៅឆ្នាំ២០២៤  ក្នុងអំឡុងពេលរដ្ឋបាលលោក Biden ដែលតម្រូវឱ្យដកចេញដោយសារតែបារម្ភថាទិន្នន័យអ្នកប្រើប្រាស់ TikTok របស់អាមេរិកអាចត្រូវបានចូលប្រើដោយរដ្ឋាភិបាលចិន ដែលអនុញ្ញាតឱ្យទីក្រុងប៉េកាំងអាចលួចយកការណ៍លើជនជាតិអាមេរិក ឬធ្វើប្រតិបត្តិការឥទ្ធិពលតាមរយៈអែប កម្មវិធីនេះ៕