មេដឹកនាំប្រទេសបេឡារុស លោក Alexander Lukashenko បាននិយាយកាលពីថ្ងៃអង្គារថា ប្រទេសរុស្ស៊ី និងបេឡារុស កំពុងហាត់សម ការបាញ់អាវុធនុយក្លេអ៊ែរតាកទិករបស់រុស្ស៊ី ដែលជាផ្នែកមួយនៃល្បែងសង្គ្រាមរួមគ្នា។ ប្រព័ន្ធផ្សព្វផ្សាយរដ្ឋបានដកស្រង់សម្តីប្រធានសេនាធិការកងទ័ពបេឡារុស ដែលនិយាយថា សមយុទ្ធនេះក៏មានការបង្ហាញពីមីស៊ីលលឿនជាងសំឡេង Oreshnik របស់រុស្ស៊ី ដែលបានបាញ់សាកល្បងកាលពីឆ្នាំមុន ក្នុងសង្គ្រាមជាមួយអ៊ុយក្រែន ផងដែរ។ 

ប្រទេសរុស្ស៊ី និងបេឡារុស កំពុងបិទបញ្ចប់ល្បែងសង្រ្គាមរយៈពេលប្រាំថ្ងៃដែលមានឈ្មោះថា Zapad ក្នុងការបង្ហាញកម្លាំងដែលគេនិយាយថា គឺដើម្បីសាកល្បងការត្រៀមខ្លួនប្រយុទ្ធ ប៉ុន្តែបានធ្វើឱ្យប្រទេសជុំវិញមួយចំនួនមានការភ្ញាក់ផ្អើល។       

ដោយស្លៀកពាក់ឈុតយោធា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានជួបជាមួយមន្ត្រីយោធាកំពូលៗ កាលពីថ្ងៃអង្គារ ក្នុងតំបន់ Nizhny Novogorod របស់រុស្ស៊ី ជាកន្លែងដែលសមយុទ្ធមួយចំនួនបានកើតឡើង។ 

ប្រមុខវិមានក្រឹមឡាំងរូបនេះបាននិយាយនៅក្នុងការអត្ថាធិប្បាយដែលផ្សាយតាមទូរទស្សន៍រដ្ឋថា បុគ្គលិកយោធាប្រហែល ១០ម៉ឺននាក់ បានចូលរួមក្នុងសមយុទ្ធនេះ ដែលពាក់ព័ន្ធនឹងសម្ភារៈយោធាដ៏ច្រើន។លោកពូទីនបាននិយាយថា សមយុទ្ធនេះគឺដើម្បីធានា "ការការពារដោយគ្មានលក្ខខណ្ឌនៃអធិបតេយ្យភាព និងបូរណភាពទឹកដីនៃរដ្ឋសហភាព" ដោយសំដៅទៅលើសម្ព័ន្ធភាពនៃប្រទេសរុស្ស៊ី និងបេឡារុស។

ល្បែងសង្រ្គាម ដែលក្រុមអ្នកវិភាគយោធាលោកខាងលិច និយាយថា ត្រូវបានរៀបចំឡើង ដើម្បីបំភិតបំភ័យអឺរ៉ុប កើតឡើងតែប៉ុន្មានថ្ងៃប៉ុណ្ណោះ បន្ទាប់ពីកងកម្លាំងប៉ូឡូញ និងណាតូ និយាយថា ពួកគេបានបាញ់ទម្លាក់យានដ្រូនរបស់រុស្ស៊ី ដែលបានចូលដែនអាកាសប៉ូឡូញ៕