រដ្ឋមន្ត្រីទេសចរណ៍របស់ប៉េរូ បាននិយាយថា យ៉ាងហោចណាស់មានអ្នកទេសចរ ៩០០នាក់ ត្រូវជាប់គាំងនៅជិតទីតាំងបុរាណដ៏ល្បីល្បាញ ឈ្មោះ Machu Picchu របស់ប៉េរូ កាលពីថ្ងៃអង្គារ (១៦ កញ្ញា) បន្ទាប់ពីសេវារថភ្លើងដឹកអ្នកដំណើរមួយត្រូវផ្អាកដំណើរការ ដោយសារតែការតវ៉ា។

ប្រតិបត្តិកររថភ្លើង PeruRail និយាយថា សេវាកម្មរបស់ខ្លួនត្រូវផ្អាកតាំងតែពីថ្ងៃចន្ទមក ដោយសារផ្លូវធ្វើដំណើរនៅក្នុងតំបន់ភ្នំ Cusco របស់ប៉េរូ ត្រូវរារាំងដោយដុំថ្មជាច្រើន នៅពេលអ្នកស្រុកចេញតវ៉ានៅក្នុងតំបន់នោះ ជុំវិញការប៉ះទង្គិចជាមួយអាជ្ញាធរ និងក្រុមហ៊ុនរថយន្តក្រុង។

ក្រុមអ្នកតវ៉ានិយាយថា មានការខ្វះខាតតម្លាភាព និងយុត្តិធម៌ក្នុងដំណើរការផ្លាស់ប្តូរប្រតិបត្តិកររថយន្តក្រុងទេសចរណ៍ Consettur បន្ទាប់ពីសម្បទានរបស់ខ្លួនផុតកំណត់ ដែលត្រួសត្រាយផ្លូវសម្រាប់អាជីវកម្មក្នុងស្រុកផ្សេងៗគ្នាដើម្បីទទួលបានអត្ថប្រយោជន៍ពីឧស្សាហកម្មដ៏សំខាន់មួយនេះ។ ការតវ៉ានេះចាប់ផ្តើមកាលពីសប្តាហ៍មុន បន្ទាប់ពីសម្បទានរបស់ក្រុមហ៊ុន Consettur បានបញ្ចប់។

រដ្ឋមន្ត្រីក្រសួងទេសចរណ៍ លោកស្រី Desilu Leon បានប្រាប់វិទ្យុក្នុងស្រុកថា ភ្ញៀវទេសចរ ១.៤០០នាក់ ត្រូវបានជម្លៀសចេញរួចហើយកាលពីថ្ងៃចន្ទ ប៉ុន្តែប្រហែល ៩០០នាក់ទៀតនៅតែជាប់គាំងនៅក្នុងតំបន់ Aguas Calientes ដែលជាទីប្រជុំជននៅជិតបំផុតទៅនឹងតំបន់វប្បធម៌ Machu Picchu ដែលមានអ្នកចូលទស្សនាច្រើនបំផុតរបស់ប្រទេសប៉េរូ៕