ប្រទេសស៊ីរី ហ្ស៊កដានី និងសហរដ្ឋអាមេរិក បានប្រកាសពីផែនការដើម្បីស្ដារសន្តិសុខឡើងវិញនៅក្នុងទីក្រុង Suwayda ជាកន្លែងមានអំពើហិង្សាខាងនិកាយសាសនាកាលពីខែកក្កដា ដែលបានឆក់យកជីវិតមនុស្សជាង២៥០នាក់។

ផែនទីបង្ហាញផ្លូវសម្រាប់ដំណោះស្រាយនៅទីក្រុង Suwayda រួមមាន ឲ្យទទួលខុសត្រូវសម្រាប់អ្នកទាំងឡាយណាដែលបានវាយប្រហារជនស៊ីវិល បន្តផ្តល់ជំនួយមនុស្សធម៌និងផ្នែកវេជ្ជសាស្រ្ត ផ្តល់សំណងដល់អ្នកដែលរងផលប៉ះពាល់ ធានាការវិលត្រឡប់ទៅវិញរបស់ជនភៀសខ្លួន ស្តារសេវាជាមូលដ្ឋាន ការដាក់ពង្រាយកងកម្លាំងក្រសួងមហាផ្ទៃក្នុងតំបន់ដើម្បីការពារតាមដងផ្លូវ បង្ហាញពីជោគវាសនានៃអ្នកបាត់ខ្លួននិងអ្នកត្រូវបានចាប់ពង្រត់»។ រដ្ឋមន្ត្រីការបរទេសស៊ីរី លោក Asaad al-Shibani បាននិយាយក្នុងសេចក្តីប្រកាសព័ត៌មានបន្ទាប់ពីបានជួបជាមួយសមភាគីប្រទេសហ្ស៊កដានី លោក Ayman Safadi និងបេសកជនរបស់សហរដ្ឋអាមេរិកប្រចាំនៅស៊ីរី លោក Tom Barrack នៅទីក្រុងដាម៉ាស ។

លោក Al-Shibani បាននិយាយថា រដ្ឋាភិបាលកំពុងធ្វើការលើផែនការមួយសម្រាប់ការវិលត្រឡប់ទៅវិញនៃជនភៀសខ្លួនដោយសារអំពើហិង្សាចំនួនជាង១៦០.០០០នាក់ នេះបើយោងតាមតួលេខរបស់អង្គការសហប្រជាជាតិ។

អំពើហិង្សាបានផ្ទុះឡើងកាលពីថ្ងៃទី១៣ ខែកក្កដា រវាងក្រុមអ្នកប្រយុទ្ធកុលសម្ព័ន្ធ Bedouin និងក្រុមជនជាតិភាគតិច Druze នៅក្នុងខេត្តភាគខាងត្បូងប្រទេសស៊ីរី។