ក្រុមហ៊ូទីនៅប្រទេសយេម៉ែន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ខ្លួនបានបើកការវាយប្រហារនៅទីក្រុងTel Aviv និងនៅអាកាសយានដ្ឋានRamon ក្នុងទីក្រុង Eilat បន្ទាប់ពីអ៊ីស្រាអែលបានវាយប្រហារតាមអាកាសទៅលើទីក្រុងកំពង់ផែHodeidah គ្រប់គ្រងដោយក្រុមហ៊ូទី។

លោក Yahya Sarea អ្នកនាំពាក្យយោធាក្រុមហ៊ូទី បាននិយាយថា មីស៊ីលបាលីស្ទីកបានកំណត់គោលដៅលើ «ទីតាំងដ៏រសើប» នៅភាគខាងត្បូងទីក្រុង Tel Aviv ហើយយានដ្រូនមួយគ្រឿងត្រូវបានបង្ហោះតម្រង់គោលដៅនៅអាកាសយានដ្ឋាន Ramon ក្នុងទីក្រុង Eilat ។

លោកបាននិយាយក្នុងសេចក្តីថ្លែងការណ៍ចាក់ផ្សាយតាមទូរទស្សន៍ al-Masirahរបស់ក្រុមហ៊ូទី ថា ការវាយប្រហារនេះគឺដើម្បីឆ្លើយតបទៅនឹង «ការកើនឡើងយោធាអ៊ីស្រាអែល» នៅក្នុងតំបន់ហ្កាហ្សា និងចំពោះ «ការឈ្លានពានរបស់អ៊ីស្រាអែល» លើប្រទេសយេម៉ែន។

ទន្ទឹមនឹងនេះ យោធាអ៊ីស្រាអែល បាននិយាយនៅក្នុងសេចក្តីថ្លែងការណ៍ថា មីស៊ីលមួយគ្រាប់ដែលបានបាញ់ចេញពីប្រទេសយេម៉ែន បានបង្កឱ្យមានស៊ីរ៉ែនព្រមានពីវាយប្រហារតាមអាកាសនៅទូទាំងភាគខាងត្បូងប្រទេសអ៊ីស្រាអែល ដែលក្រោយមកត្រូវបានស្ទាក់ចាប់។ ពុំមានការរាយការណ៍ពីចំនួនអ្នកស្លាប់ឬរងរបួស ឬការខូចខាតនោះទេ។ ការវាយប្រហាររបស់ក្រុមហ៊ូទី បានកើតឡើងប៉ុន្មានម៉ោងបន្ទាប់ពីយោធាអ៊ីស្រាអែល បាននិយាយថា ខ្លួនបានវាយប្រហារលើកំពង់ផែ Hodeidah នៅភាគខាងលិចប្រទេសយេម៉ែន ដោយដាក់គោលដៅលើអ្វីដែលខ្លួនបានពិពណ៌នាថាជា «ហេដ្ឋារចនាសម្ព័ន្ធយោធារបស់ក្រុមហ៊ូទី»។