ក្រុមមន្ត្រីនគរបាលនិយាយថា អាជ្ញាធរប្រទេសសេណេហ្គាល់បានស្ទាក់ចាប់ជនអន្តោប្រវេសន៍ចំនួន១១២នាក់នៅលើទូកឈើវែងមួយគ្រឿងនៅឆ្នេរសមុទ្រទីក្រុង Dakar កាលពីថ្ងៃអង្គារ ទី១៦ ខែកញ្ញា ខណៈពួកគេបានប៉ុនប៉ងធ្វើដំណើរទៅកាន់ទ្វីបអឺរ៉ុប តាមរយៈផ្លូវលើមហាសមុទ្រអាត្លង់ទិកដ៏គ្រោះថ្នាក់។

ក្រុមនេះ រួមមានបុរសទាំងអស់ ដែលត្រូវបានគេប្រទះឃើញដោយអ្នកនេសាទក្នុងតំបន់នៅត្រឹមតែប៉ុន្មានគីឡូម៉ែត្រប៉ុណ្ណោះពីឆ្នេរសមុទ្រទីក្រុងDakar ជាកន្លែងដែលទូករបស់ជនអន្តោប្រវេសន៍កំពុងរសាត់ដោយម៉ាស៊ីនខូច។ យោងតាមអាជ្ញាធរមូលដ្ឋានបានឱ្យដឹងថា ជនអន្តោប្រវេសន៏ទាំងអស់ត្រូវបាននាំយកទៅកាន់ឆ្នេរសមុទ្រដោយសុវត្ថិភាព ហើយបច្ចុប្បន្នកំពុងត្រូវបានដាក់ឃុំ។

ការធ្វើអន្តោប្រវេសន៍មិនទៀងទាត់ពីអាហ្រ្វិកខាងលិចទៅអឺរ៉ុប ជាពិសេសនៅតាមបណ្តោយផ្លូវសមុទ្រអាត្លង់ទិកទៅកាន់កោះ Canary របស់ប្រទេសអេស្ប៉ាញ គឺជាបញ្ហាប្រឈមសម្រាប់ឆ្មាំល្បាតឆ្នេរនៅក្នុងតំបន់។ អាជ្ញាធរប្រទេសអេស្ប៉ាញ បានរាយការណ៍អំពីការទៅដល់នៃជនអន្តោប្រវេសន៍ជិត៣២.០០០នាក់តាមទូកនៅកោះ Canary ក្នុងឆ្នាំ២០២៣ដែលកើនឡើងពី២.៦៨៧នាក់ក្នុងឆ្នាំ២០១៩ នេះបើយោងតាមទិន្នន័យដកស្រង់ដោយអង្គការទេសសន្តប្រវេសន៍អន្តរជាតិ(IOM) និងរបាយការណ៍តាមដានការធ្វើអន្តោប្រវេសន៍របស់អង្គការសហប្រជាជាតិ។

ទោះបីជាមានការបង្កើនកិច្ចសហប្រតិបត្តិការរវាងប្រទេសនៅអឺរ៉ុប និងអាហ្វ្រិកខាងលិច ដើម្បីដោះស្រាយការធ្វើអន្តោប្រវេសន៍មិនទៀងទាត់ក៏ដោយ ក៏មូលហេតុនៃឫសគល់ដ៏ស្មុគស្មាញនៅតែបន្តជំរុញនិន្នាការដ៏គ្រោះថ្នាក់នេះ។ អ្នកជំនាញបានលើកឡើងពីការលំបាកផ្នែកសេដ្ឋកិច្ច អស្ថិរភាពនយោបាយ និងផលប៉ះពាល់នៃបម្រែបម្រួលអាកាសធាតុលើការចិញ្ចឹមជីវិតបែបប្រពៃណី ដែលជាកត្តាសំខាន់ជំរុញឱ្យមានការធ្វើអន្តោប្រវេសន៍ចេញពីតំបន់។