ឆ្មាំល្បាតឆ្នេររបស់ចិន បានចោទប្រកាន់នាវាហ្វីលីពីនមួយគ្រឿង ថាមានចេតនាបើកបំបុកនាវារបស់ខ្លួន កាលពីថ្ងៃអង្គារ (១៦ កញ្ញា) នៅជិតដែនទឹកជម្លោះ Scarborough Shoal ក្នុងសមុទ្រចិនខាងត្បូង។ ប៉ុន្តែហ្វីលីពីន បានបដិសេធរឿងនេះ ដោយនិយាយថា កម្លាំងរបស់ចិន បានប្រើកាណុងបាញ់ទឹកយ៉ាងខ្លាំងក្លា ដែលបានបំផ្លាញនាវារបស់ខ្លួន និងបង្ករបួសដល់បុគ្គលិកម្នាក់នៅលើនាវា។

សេចក្តីថ្លែងការណ៍របស់ឆ្មាំល្បាតឆ្នេរចិន បាននិយាយថា នាវារដ្ឋាភិបាលហ្វីលីពីនជាង ១០គ្រឿង មកពីទិសដៅផ្សេងៗគ្នា បានចូលទៅដែនទឹកជុំវិញថ្មប៉ប្រះទឹក Scarborough Shoal នោះដែលចិនហៅថាកោះ Huangyan ដោយបន្ថែមថា ខ្លួនបានប្រើកាណុងបាញ់ទឹកប្រឆាំងនឹងនាវាដែលបំពាននោះ។

ការប៉ះទង្គិចគ្នាជាថ្មីនេះបានកើតឡើងរយៈពេល ៦ថ្ងៃប៉ុណ្ណោះ បន្ទាប់ពីប្រទេសចិនប្រកាសថា ខ្លួនបានកំណត់យកផ្នែកនៃ Scarborough Shoal ធ្វើជាតំបន់បម្រុងធម្មជាតិជាតិ។ រដ្ឋាភិបាលហ្វីលីពីន ដែលហៅដែនទឹកជម្លោះនោះថា Bajo de Masinloc បានដាក់ការតវ៉ាផ្នែកការទូត ជំទាស់នឹងជំហាននេះ។

ចិន និងហ្វីលីពីនបានប៉ះទង្គិចគ្នាម្តងហើយម្តងទៀតជុំវិញដែនទឹកដ៏ចម្រូងចម្រាសនៅសមុទ្រចិនខាងត្បូង ដែលទីក្រុងប៉េកាំង ទាមទារស្ទើរតែទាំងស្រុង។ ប្រទេសទាំងពីរស្ថិតក្នុងចំណោមបណ្ដាប្រទេសមួយចំនួនផ្សេងទៀត ដែលក៏ប្រជែងគ្នាអះអាងសិទ្ធិនៅក្នុងដែនទឹកនេះ ដែលជាផ្លូវទឹកមានសារៈសំខាន់ជាយុទ្ធសាស្ត្រ និងជាកន្លែងសម្រាប់នេសាទដ៏មានតម្លៃ៕