ព្រះសីហនុ៖ រដ្ឋបាលខេត្តព្រះសីហនុ បានក្រើនរំលឹកទៅសមត្ថកិច្ច និងប្រជាពលរដ្ឋទាំងអស់ ឱ្យអនុវត្តតាមវិធានសុខាភិបាល អំឡុងពិធីបុណ្យចូលឆ្នាំថ្មីប្រពៃណីចិន និងវៀតណាមខាងមុខនេះ ដើម្បីទប់ស្កាត់ការឆ្លងរីករាលដាលនៃមេរោគកូវីដ-១៩ ប្រភេទអូមីក្រុងនៅក្នុងសហគមន៍។
ក្នុងសេចក្ដីណែនាំចេញនៅថ្ងៃនេះ រដ្ឋបាលខេត្តព្រះសីហនុ បានហាមឃាត់នូវសកម្មភាពមួយចំនួន ដូចជា ការដាក់លក់ជាតិផ្ទុះគ្រប់ប្រភេទ ដោយថា ធាតុផ្ទុះទាំងនោះអាចបង្កជាអគ្គិភ័យជាយថាហេតុ។
រដ្ឋបាលខេត្តនេះ ក៏ហាមឃាត់ការលេងល្បែងស៊ីសងគ្រប់ប្រភេទផងដែរនៅអំឡុងពេលប្រារព្ធពិធីបុណ្យចូលឆ្នាំថ្មីប្រពៃណីចិន និងវៀតណាម ដែលនឹងធ្វើឡើងនៅចន្លោះថ្ងៃទី៣១ ខែមករា រហូតដល់ថ្ងៃទី០២ ខែកុម្ភៈខាងមុខនេះ។
ខណៈដែលមេរោគកូវីដ-១៩ប្រភេទអូមីក្រុងកំពុងឆ្លងចូលក្នុងសហគមន៍នោះ រដ្ឋបាលខេត្តព្រះសីហនុ ក៏បានក្រើនរំលឹកផងដែរអំពីការអនុវត្តឱ្យបានត្រឹមត្រូវទៅតាមវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺនេះ។
រដ្ឋបាលខេត្តព្រះសីហនុ ក៏បានណែនាំផងដែរទៅអាជ្ញាធរមូលដ្ឋាន និងកងកម្លាំងប្រដាប់អាវុធ ឱ្យពង្រឹងសន្តិសុខ សុវត្ថិភាព និងសណ្ដាប់ធ្នាប់សាធារណៈនៅតាមមូលដ្ឋាន ដើម្បីទប់ស្កាត់គ្រោះថ្នាក់នានា ជាពិសេសគ្រោះអគ្គិភ័យអំឡុងពេលប្រារព្ធពិធីបុណ្យនេះ។
រដ្ឋបាលខេត្តមួយនេះ ក៏បានក្រើនរំលឹកទៅនគរបាលឱ្យពង្រឹងសុវត្ថិភាពចរាចរណ៍ ដើម្បីទប់ស្កាត់ការបើកបរទាំងស្រវឹង និងលើសល្បឿនកំណត់ ដែលនាំឱ្យមានគ្រោះថ្នាក់ដល់អាយុជីវិត។
ប្រជាពលរដ្ឋកម្ពុជាខ្សែស្រឡាយចិន និងវៀតណាមនៅក្នុងប្រទេសកម្ពុជា នឹងប្រារព្ធពិធីបុណ្យចូលឆ្នាំថ្មីប្រពៃណីរបស់ពួកគេចាប់ពីថ្ងៃទី៣១ ខែមករា ដល់ថ្ងៃទី០២ ខែកុម្ភៈ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
