ប្រទេសនេប៉ាល់កំពុងប៉ាន់ប្រមាណនូវទំហំខូចខាតដែលគិតជាទឹកប្រាក់រាប់លានដុល្លារ ដោយសារការតវ៉ាហិង្សា កាលពីសប្តាហ៍មុន នៅពេលដែលរដ្ឋសភា ការិយាល័យរដ្ឋាភិបាល និងសណ្ឋាគារ Hilton Hotel ដែលទើបនឹងបើកដំណើរការថ្មី ត្រូវបានដុតបំផ្លាញ។

យោងតាមតួលេខផ្លូវការបានឲ្យដឹងថា យ៉ាងហោចណាស់មនុស្ស ៧២នាក់ ត្រូវបានសម្លាប់នៅក្នុងការតវ៉ាប្រឆាំងអំពើពុករលួយរយៈពេល ២ថ្ងៃ ដោយរាប់សិបនាក់ផ្សេងទៀតបានរងរបួសធ្ងន់ធ្ងរ។ 

អ្នកនាំពាក្យនគរបាល លោក Binod Ghimire បានប្រាប់បណ្ដាញសារព័ត៌មានថា «អ្វីៗជាច្រើនត្រូវបានបំផ្លិចបំផ្លាញ» ដោយលោកបានបន្ថែមថា វានឹងត្រូវការពេលវេលា ដើម្បីគណនាទំហំទាំងស្រុងនៃការខូចខាត ដែលរួមទាំងនៅខាងក្រៅរដ្ឋធានីផងដែរ។ នាយករដ្ឋមន្ត្រីបណ្តោះអាសន្នថ្មីរបស់នេប៉ាល់ លោកស្រី Sushila Karki ដែលបាននិយាយនៅពេលដែលលោកស្រីចាប់ផ្តើមការងារកាលពីថ្ងៃទី១៤ ខែកញ្ញា បានពណ៌នាអំពី «ការបាត់បង់ជីវិត និងទ្រព្យសម្បត្តិយ៉ាងទូលំទូលាយ»។

នៅឯតុលាការកំពូល មន្ត្រីកំពុងធ្វើការនៅក្រោមតង់នៅខាងក្រៅអគារដែលត្រូវបានអគ្គិភ័យឆាបឆេះខ្ទេចខ្ទី នៅក្បែជួររថយន្តដែលត្រូវបានដុតឆេះម៉ត់ខ្ទេច ដោយពួកគេកំពុងព្យាយាមសម្អាតឯកសារដែលទទឹកជោគ អំឡុងពេលមានការបាញ់ទឹកពន្លត់អណ្ដាតភ្លើង។ អ្នកថតរូបរបស់បណ្ដាញសារព័ត៌មានដែលបានទៅមើលអគារសភាដែលរងការខូចខាត បាននិយាយថា សាលទាំងមូលត្រូវបានខូចខាត ដោយសារអណ្ដាតភ្លើងដែលឆេះមិនអាចគ្រប់គ្រងបានអស់រយៈពេលជាច្រើនម៉ោង កាលពីថ្ងៃទី៩ ខែកញ្ញា។ 

សមាគមសណ្ឋាគារនេប៉ាល់ បានប្រាប់ថា សណ្ឋាគារជាង ២០ បានរងការខូចខាត ដែលក្នុងនោះរួមទាំងការឆេះនៅសណ្ឋាគារ Hilton ផងដែរ ហើយកន្លែងផ្សេងទៀតត្រូវបានលួច។ ការខាតបង់ត្រូវបានគេប៉ាន់ប្រមាណថា មានចំនួន ២៥ពាន់លានរូពីនេប៉ាល់ (១៧៧លានដុល្លារ) ដោយមានកម្មករជាង ២.០០០នាក់ រងប៉ះពាល់។ ត្រឹមតែការខូចខាត នៅសណ្ឋាគារ Hilton តែមួយ ត្រូវបានគេដាក់កម្រិតខ្ពស់រហូតដល់ ៥៦លានដុល្លារ៕