មន្ត្រីជាន់ខ្ពស់នៃអង្គការសន្ធិសញ្ញាអាត្លង់ទិកខាងជើង ឬ NATO និយាយថា សម្ព័ន្ធមិត្តនេះកំពុងសម្លឹងមើលគ្រប់មធ្យោបាយដើម្បីទប់ទល់នឹងយានដ្រូន ជាជាងការបាញ់ទម្លាក់យានដោយយន្តហោះចម្បាំង។ កាលពីសប្តាហ៍មុន យានដ្រូនរបស់រុស្ស៊ី បានរំលោភលើដែនអាកាសរបស់ប្រទេសប៉ូឡូញ ហើយយន្តហោះចម្បាំងមកពីប្រទេសសមាជិកសម្ព័ន្ធយោធាណាតូ ស្ទាក់ចាប់បានយានដ្រូនមួយចំនួន។

មន្ត្រីអង្គការណាតូបាននិយាយទៅកាន់ប្រព័ន្ធផ្សព្វផ្សាយថា សម្ព័ន្ធមិត្តនេះទទួលស្គាល់ថា វិធីល្អបំផុតក្នុងការកម្ទេចយានដ្រូនពុំមែនប្រើប្រាស់មីស៊ីលមានតម្លៃថ្លៃខ្លាំងដែលបាញ់ចេញពីយន្តហោះដែលមានតម្លៃថ្លៃខ្លាំងនោះទេ។ មន្ត្រីរូបនេះបាននិយាយថា រដ្ឋជាសមាជិកនឹងពិចារណាលើវិធីសាស្រ្តដូចជា ការត្រួតពិនិត្យរយៈកម្ពស់ទាបពីឧទ្ធម្ភាគចក្រ ការចាប់សញ្ញាសូរសំឡេង និងការប្រើប្រាស់ប្រភេទនៃក្រុមអគ្គិភ័យចល័តនៅលើដីដែលអ៊ុយក្រែនបានដាក់ពង្រាយ។

ជាមួយគ្នានេះ អធិការបតីអាល្លឺម៉ង់ លោក Friedrich Merz បានជួបជាមួយប្រធានាធិបតីប៉ូឡូញ លោក Karol Nawrocki នៅទីក្រុងប៊ែឡាំងកាលពីថ្ងៃអង្គារ។ លោក Merz បានសង្កត់ធ្ងន់ថា អាល្លឺម៉ង់កំពុងឈរយ៉ាងរឹងមាំនិងមិនងាករេនៅខាងភាគីប៉ូឡូញក្នុងការប្រឈមមុខទៅនឹងការគំរាមកំហែងបង្កឡើងដោយរុស្ស៊ី។ លោកបាននិយាយថា ប្រទេសរបស់លោកបានពង្រីកបេសកកម្មល្បាតតាមដែនអាកាសលើប្រទេសប៉ូឡូញ។

សម្ព័ន្ធយោធា NATO បានប្រកាសថា ប្រទេសចំនួនប្រាំបី រួមទាំងប្រទេសអាល្លឺម៉ង់ និងបារាំង នឹងដាក់ពង្រាយយន្តហោះនិងសមត្ថភាពផ្សេងទៀត ដើម្បីពង្រឹងប្រព័ន្ធការពារដែនអាកាសរបស់ប្រទេសសមាជិកនៅអឺរ៉ុបខាងកើតដែលនៅជិតប្រទេសរុស្ស៊ី។