​បាល់បោះ៖ ​ក្រុម​ Los Angeles Clippers បានធ្វើការ​វាយបក​ពីក្រោយ ៣៥​ពិន្ទុ​រហូត​យក​ឈ្នះ Washington Wizards ១១៦-១១៥ នៃ​ការប្រកួត​បាល់បោះ​ក្របខណ្ឌ NBA សហរដ្ឋអាមេរិក​។ ​​នេះ​ជាការ​វាយបក​យកឈ្នះ​ក្នុង​គំលាត​ច្រើន​ពិន្ទុ​បំផុត​លំដាប់​លេខ ២ ក្នុង​ប្រវត្តិសាស្ត្រ​បាល់បោះ NBA​។​ ​គិត​ត្រឹម​វគ្គ​ទី១ Washington Wizards បាន​នាំមុខ​លើក Clippers ៦៦-៣១​។

​នៅសល់តែ ១០វិនាទី​ទៀត​ចប់​ការប្រកួត Wizards នាំមុខ ១១៥-១០៦ ពោលគឺ​គំលាត​សល់​ត្រឹម ៦ពិន្ទុ​តែ Luke Kennard បាន​បោះ​យក​បី​ពិន្ទុ​លើក​ទី១ និង​នៅសល់តែ ២វិនាទី​ទៀត​ចប់ Kennard ដដែល​ក៏បាន​បោះ​បាន​បី​ពិន្ទុម្តងទៀត​មានន័យថា​ ស្មើគ្នា ១១៥-១១៥ តែ Wizards ក៏មាន​កំហុស​មួយ​ផង​ដែរ​ដែល​ធ្វើឱ្យ Kennard ដដែល​ជា​អ្នក​បោះបាល់​ពិន័យ​បានសំរេច​យកឈ្នះ​ប្រផិតប្រផើយ ១១៦-១១៥ ឱ្យ Los Angeles Clippers​។​ ​Los Angeles Clippers បន្ត​ឈរ​លេខ ៩ ក្នុង​តារាង​ភាគ​ខាង​លិច​ប្រកួត​ឈ្នះ ២៤ ចាញ់ ២៥ ខណៈ Washington Wizards ឈរ​លេខ ១០ នៅ​ភាគ​ខាងកើត​ប្រកួត​ឈ្នះ ២៣ ចាញ់ ២៥​។ ​រំលឹកថា ​មានតែ Utah Jazz មួយ​ប៉ុណ្ណោះ​ដែល​កំណត់ត្រា​វាយបក​យក​ឈ្នះ​ច្រើន​ពិន្ទុ​បំផុត​ដល់​ទៅ ៣៦ពិន្ទុ​រហូត​យកឈ្នះ Denver Nuggets កាលពី​ឆ្នាំ១៩៩៦​។

​​ងាក​មក​លទ្ធផល​ផ្សេងទៀត Los Angeles Lakers បាន​យកឈ្នះ Brooklyn Nets ១០៦-៩៦ ដោយ LeBron James ម្នាក់ឯង​បោះ​បាន ៣៣ពិន្ទុ​។ ​សំរាប់ Brooklyn Nets មិនមាន​វត្តមាន​កីឡាករ​សំខាន់ៗ​មួយចំនួន​ដូចជា Kevin Durant ដែលមាន​របួស ​និង Kyle Irving ពី​ព្រោះ​មិនបាន​ចាក់​វ៉ាក់សាំង​។ ​ចំណែកឯ Philadelphia យកឈ្នះ New Orleans Pelicans ១១៧-១០៧ និង Boston Celtics យកឈ្នះ Sacramento Kings ១២៨-៧៥៕

​អត្ថបទ​៖​នាង សុភា​វុ​ធ