សម្តេច ប៉ាប ឡេអូ ទី១៦ (Pope Leo XVI) នៅថ្ងៃពុធ (ទី១៦ ខែកញ្ញា) នេះ បានបង្ហាញហទ័យសាមគ្គីភាពជាមួយប្រជាជន នៅតំបន់ហ្កាហ្សា ដោយព្រះអង្គមានបន្ទូលថា «ជាថ្មីម្តងទៀត» ជនស៊ីវិលត្រូវបានបង្ខំឲ្យចាកចេញពីដែនដីរបស់ពួកគេ ហើយកំពុងរស់នៅក្នុង «ស្ថានភាពមិនអាចទទួលយកបាន»។

បន្ទាប់ពីមានបរិស័ទទៅជួបជុំស្ដាប់ឱវាទរបស់ព្រះអង្គ សម្តេច ប៉ាប ព្រះជន្ម ៧០ព្រះវស្សា បានមានបន្ទូលថា៖ «ខ្ញុំសូមបង្ហាញនូវសាមគ្គីភាពដ៏ជ្រាលជ្រៅរបស់ខ្ញុំ ជាមួយប្រជាជនប៉ាឡេស្ទីន នៅតំបន់ហ្កាហ្សាដែលបន្តរស់នៅក្នុងភាពភ័យខ្លាច និងរស់នៅក្នុងស្ថានភាពមិនអាចទទួលយកបាន ដោយត្រូវបានបង្ខំឲ្យបម្លាស់ទីលំនៅជាថ្មីម្តងទៀតពីដែនដីរបស់ពួកគេ»។

អ្នកស្រុករាប់រយពាន់នាក់នៃទីក្រុងហ្កាហ្សា បានព្យាយាមជម្លៀសចេញពីទីក្រុងភាគខាងជើងមួយនេះ ចាប់តាំងពីមានការទម្លាក់គ្រាប់បែកយ៉ាងខ្លាំង ដោយកងកម្លាំងអ៊ីស្រាអែល ដែលអះអាងថា ខ្លួនមានគោលបំណងកម្ទេចក្រុមហាម៉ាស។

សម្តេច ប៉ាប បានមានបន្ទូលបន្ថែមថា៖ «ខ្ញុំសូមបន្តការអំពាវនាវរបស់ខ្ញុំ ឲ្យមានបទឈប់បាញ់ ឲ្យមានការដោះលែងចំណាប់ថ្នូរ ឲ្យមានដំណោះស្រាយការទូតដែលទទួលយកបាន និងឲ្យមានការគោរពទាំងស្រុង ចំពោះច្បាប់មនុស្សធម៌អន្តរជាតិ។ ខ្ញុំសូមអញ្ជើញអ្នករាល់គ្នាឲ្យចូលរួមជាមួយការអធិដ្ឋានចេញពីដួងចិត្តរបស់ខ្ញុំ ដែលសុំឲ្យពន្លឺនៃសន្តិភាព និងយុត្តិធម៌រះឡើងឆាប់ៗ»៕