នគរបាលអេស្ប៉ាញ នៅថ្ងៃពុធ (ទី១៧ ខែកញ្ញា) នេះ បានឲ្យដឹងថា ពួកគេបានចាប់ខ្លួនមនុស្ស ១៩នាក់ដែលត្រូវបានចោទប្រកាន់ពីបទមនុស្សឃាត និងការធ្វើទារុណកម្ម នៅលើទូក ចំពោះជនអន្តោប្រវេសន៍ដែលធ្វើដំណើរពីប្រទេសសេណេហ្គាល់ទៅកាន់ប្រជុំកោះ Canary ជាទីដែលមនុស្សយ៉ាងហោចណាស់ ៥០នាក់ បានបាត់ខ្លួន។

នគរបាលជាតិអេស្ប៉ាញ បានប្រាប់ថា នាវាធ្វើអំពីឈើនេះ ត្រូវបានជួយសង្គ្រោះពេលអណ្តែតនៅភាគខាងត្បូងនៃកោះ Gran Canaria ក្នុងមហាសមុទ្រអាត្លង់ទិក កាលពីថ្ងៃទី២៤ ខែសីហា ដោយមានអ្នកនៅរស់រានមានជីវិតចំនួន ២៤៨នាក់ នៅលើនោះ។

អាជ្ញាធរជឿថា ទូកដំបូងឡើយផ្ទុកមនុស្សប្រហែល ៣០០នាក់ ហើយភាគច្រើននៃអ្នកបាត់ខ្លួនត្រូវបានគេសន្មត់ថា ត្រូវបានទម្លាក់ពីលើនាវានោះ ក្នុងអំឡុងពេលធ្វើដំណើររយៈពេល ១១ថ្ងៃ។

នគរបាលបានឲ្យដឹងនៅក្នុងសេចក្តីថ្លែងការណ៍មួយថា អ្នករួចជីវិត បានប្រាប់អ្នកស៊ើបអង្កេតថា អ្នករួមដំណើរជាច្រើននាក់ បានចាប់ផ្តើម «វាយប្រហារមនុស្សរាប់សិបនាក់ វាយដំ និងធ្វើបាបពួកគេតាមវិធីផ្សេងៗ»។ សេចក្ដីថ្លែងការណ៍បានបន្ថែមថា៖ «ក្នុងករណីខ្លះ ពួកគេបានបោះជនអន្តោប្រវេសន៍ទាំងរស់ចូលទៅក្នុងសមុទ្រ ហើយបានបដិសេធមិនជួយសង្គ្រោះអ្នកដែលធ្លាក់ដោយចៃដន្យ»។

ការសម្លាប់ខ្លះត្រូវបានគេគិតថា ជាប់ទាក់ទងនឹងអបិយជំនឿ ដោយជនរងគ្រោះត្រូវបានចោទប្រកាន់ថា ជា «មេធ្មប់» ដែលត្រូវបានចាត់ទុកថា ជាដើមហេតុនាំឲ្យខូចម៉ាស៊ីន កង្វះអាហារ ឬមានព្យុះ។ អ្នកផ្សេងទៀតត្រូវបានគេប្រាប់ថា ត្រូវបានសម្លាប់ដោយសារតវ៉ាពីលក្ខខណ្ឌអាក្រក់ នៅលើទូក។

ជនសង្ស័យទាំង ១៩នាក់ កំពុងស្ថិតក្នុងការឃុំខ្លួនបណ្តោះអាសន្ន ដោយប្រឈមនឹងការចោទប្រកាន់ពីបទដឹកជនអន្តោប្រវេសន៍ខុសច្បាប់ ឃាតកម្ម វាយដំ និងធ្វើទារុណកម្ម៕